Наредбата која ја издаде американскиот претседател Доналд Трамп за повлекување на американските воени сили од Сирија беше потпишана од американскиот министер за одбрана во заминување Џејмс Матис, соопшти денес портпаролот на министерството, извршувајќи ја со тоа одлуката на претседателот Доналд Трамп која ја предизвика оставката на Матис минатата недела.
Наредбата е потпишана откако Трамп вчера објави дека ќе го замени Матис два месеци порано од очекуваното. Американски функционери тврдат дека Трамп го направил таквиот потег поради гневот околу критиките на неговата надворешна политика во писмото на Матис за оставката.
„Извршната команда е потпишана“, му соопшти портпаролот на американското министерство за одбрана преку имејл на Ројтерс во порака која не содржела други детали. Потпишувањето беше очекувано.
Високи функционери на Пентагон за Ројтерс соопштиле дека повлекувањето може да почне во следните недели и дека се работи на планот за повлекувањето.
Во средата Трамп соопшти дека ги повлекува американските војници објаснувајќи ја одлуката со цената на ангажманот во животите на војниците на САД и парите на даночните обврзници.
Матис, кој се залагаше за НАТО и традиционалните американски сојузништва што често го доведуваше во конфликт со Трамп, го советувал САД да не се повлекуваат од Сирија, и тоа бил еден од факторите кои придонеле на одлуката за оставка.
Во писмото во кое ја соопшти оставката Матис напиша дека од должноста ќе замине кон крајот на февруари за да остави време за потврдување на неговиот наследник.
Но, американскиот претседател Доналд Трамп вчера најави дека ќе го замени Матис со Патрик Санахан уште на 1 јануари.
