Кој рече дека кафето е штетно?
Најновите истражувања носат фасцинантни увиди – не само што овој омилен напиток може да биде сојузник на здравјето, туку и времето кога го консумираме игра клучна улога во долговечноста и виталноста на срцето.
Најновата научна студија, спроведена врз повеќе од 40.000 возрасни Американци, открила дека времето на пиење кафе може да биде подеднакво важно како и неговата количина. Овие сознанија дополнително ги потврдуваат претходните истражувања кои ја поврзуваат умерената консумација на кафе со бројни придобивки, како намален ризик од срцеви заболувања, мозочен удар и дијабетес тип 2.
Додека претходно главно се зборуваше за тоа колку шолји на ден се оптимални, сега доаѓаме до неочекуван заклучок – часот кога пиете кафе може да го одреди неговото дејство врз вашето здравје.
УТРИНСКОТО КАФЕ – ЕЛИКСИР НА ДОЛГОВЕЧНОСТА
„Досегашните студии покажаа дека кафето не го зголемува ризикот од срцеви заболувања, туку напротив, може да придонесе за намалување на ризикот од одредени хронични болести“, истакнува д-р Лу Ќи, професор на Универзитетот Тулан. „Со оглед на ефектите на кофеинот врз телото, сакавме да истражиме дали времето на консумација на кафе може да има дополнително влијание врз здравјето на срцето.“
Испитаниците биле поделени во две главни групи – оние кои пијат кафе претежно наутро (36%) и оние кои уживаат во него во текот на целиот ден (14%). Останатите 48% од учесниците воопшто не консумирале кафе.
Резултатите биле зачудувачки – љубителите на утринското кафе имале значителни здравствени придобивки. Студијата, која траела речиси една деценија, покажала дека оние кои го започнуваат денот со кафе имаат 16% помал ризик од смрт од било која причина и дури 31% помал ризик од срцеви заболувања во споредба со луѓето кои воопшто не пијат кафе.
Наспроти тоа, оние кои пијат кафе во текот на целиот ден не покажале значително намалување на ризикот од смртност.
ЗДРАВСТВЕНИ ПРИДОБИВКИ ВО ЕДНА ШОЛЈА
Кога станува збор за здравјето на срцето, утринските конзументи на кафе покажале импресивни резултати – тие кои умерено пијат кафе наутро имале дури 48% помал ризик од смртност предизвикана од срцеви заболувања. Дури и оние кои пијат повеќе од три шолји дневно забележале намалување на ризикот за 39%, додека лицата кои пијат една шолја или помалку имале намалување од 35%.
ЗОШТО УТРИНСКОТО КАФЕ Е ПОДОБАР ИЗБОР?
Експертите истакнуваат две клучни причини зошто кафето наутро носи повеќе придобивки.
Прво, консумацијата на кафе подоцна во денот може да го наруши циркадијалниот ритам и да ја намали продукцијата на мелатонин – хормонот клучен за квалитетен сон и здравје на срцето. Истражувањата покажуваат дека попладневната консумација на кафе може да го намали нивото на мелатонин за дури 30% во текот на ноќта, што може негативно да влијае на регенерацијата на организмот.
Второ, антиинфламаторните својства на кафето имаат најголем ефект наутро, кога нивото на воспалителни маркери во телото е највисоко. На тој начин, утринската шолја станува моќен сојузник во борбата против воспалителните процеси и зачувувањето на здравјето на срцето.
ЗАКЛУЧОК – ВРЕМЕТО Е СÈ!
Оваа студија носи важна порака – не е само важно колку кафе пиеме, туку и кога го консумираме. Ако сакате да ја искористите неговата целосна моќ за долговечност и здравје, нека вашата шолја кафе стане неизоставен утрински ритуал.
А доколку сте вистински љубител на кафе, постои уште еден клучен состојок кој кардиолозите го препорачуваат за силно и здраво срце – но за тоа ќе зборуваме во некоја од наредните статии!
