Емили Симпсон низ солзи откри дека нејзиниот син Лук има Туретов синдром

Емили Симпсон, ѕвездата на реалното шоу „Вистинските домаќинки од округот Оринџ“, низ солзи откри дека на нејзиниот 11-годишен син Лук му е дијагностициран Туретов синдром.

„Би рекла дека Шејн и јас сега подобро се снаоѓаме како родители на Лук, затоа што многу повеќе ја разбираме неговата дијагноза. Но, сега има и Туретов синдром, па ни е тешко“, сподели 50-годишната Емили во епизодата емитувана во четвртокот.

„Многу е тешко да се справувам со сето тоа“, рече таа, обидувајќи се да ги задржи солзите. „Исцрпена сум. Постојано се грижам за него, од моментот кога ќе стане до моментот кога ќе легне.“

Во јули 2025 година, Емили првпат откри дека Лук има нарушување со избегнување или ограничување на внесот на храна, познато како ARFID. Станува збор за состојба што го ограничува внесувањето храна. Кај него е дијагностициран и ПАНДАС, група автоимуни невропсихијатриски нарушувања поврзани со стрептококна инфекција на грлото.

Таа продолжила јавно да зборува за неговите здравствени проблеми во реалното шоу откако добила многубројни пораки со поддршка од родители што минуваат низ слични искуства.

„Морав целосно да се откажам од сè што си замислував за тоа како ќе изгледа нашето семејство и што ќе правиме заедно, и да создадам сосема поинаква слика. Тоа често ме растажува“, му рече Емили на Енди Коен. „Не сакам да кажам нешто што би го повредило моето дете, но чувствувам дека морав да ја оплакувам иднината што ја замислував. … Лук е прекрасно дете. Многу е паметен.“

Водителката на подкастот „Legally Brunette“ на iHeartRadio додаде: „Морав предвреме да прекинам едно патување затоа што тој не сакаше ништо да јаде, а јас многу се исплашив. Навистина е тешко. Но, новиот лекар ми дава надеж дека ќе добиеме некакви одговори и ќе знаеме како понатаму.“

Додека зборуваше за родителските предизвици, Емили доби поддршка од сите колешки во емисијата, меѓу кои Џина Киршенхајтер, Џенифер Педранти, Хедер Дуброу, Шенон Бидор, Вики Ганвалсон и Кармела Гарсија. Со сопругот Шејн, кој исто така има 50 години, таа ја има и 13-годишната ќерка Анабел.

Тамра Џаџ ѝ предложи да ѝ се обрати на Лиса Рина, поранешната ѕвезда на „Вистинските домаќинки од Беверли Хилс“. На нејзината ќерка Делајла Бел Хамлин ѝ бил дијагностициран ПАНДАС на 11-годишна возраст. Емили одговори дека веќе разговарале накратко.

„Малку поразговаравме“, рече таа. „Би сакала во некој момент да седнам со неа и да разговараме лице в лице.“

„Вистинските домаќинки од округот Оринџ“ се емитува на Браво секој четврток во 20 часот по источноамериканско време, а новите епизоди се достапни следниот ден на Пикок.

Извор: US Weekly