Џенифер Хадсон за можниот брак со Комон: „Не секоја жена сака да се омажи“

Џенифер Хадсон досега не била во брак, а во разговор со Кеке Палмер проговори за својот став кон бракот и за врската со Комон.

„Луѓето автоматски претпоставуваат дека жените сакаат да се омажат, но тоа не е секогаш така“, изјави 45-годишната актерка од „Девојки од соништата“ во епизодата на подкастот „Baby, This Is Keke Palmer“, објавена во вторник, на 22 октомври.

Оскаровката, која со поранешниот свршеник Дејвид Отунга го има 17-годишниот син Дејвид Џуниор, призна дека не е целосно убедена во идејата за брак. Сепак, врската со 54-годишниот Комон, чие вистинско име е Лони Рашид Лин, ја опиша како прекрасна.

„Прекрасно е“, рече Хадсон за овој љубовен период од својот живот. „Мислам дека сè се случува во вистинско време. … Да, тоа е љубов.“

Водителката на „Шоуто на Џенифер Хадсон“ објасни дека нејзиното гледиште за љубовта се променило во споредба со времето кога имала дваесетина години. Како што рече, во младоста човек има идеализирана претстава што не се темели на реалноста.

„Но, откако ќе го доживеете сето тоа, појасно разбирате што навистина е љубовта и што навистина сакате од неа“, сподели Хадсон. „Токму во таа фаза сум сега.“

Гласините дека Хадсон и Комон се во врска почнаа во 2022 година, но двајцата ја потврдија романсата дури во јануари 2024 година, кога добитникот на Греми гостуваше во нејзиното ток-шоу.

Комон излезе на сцената носејќи цвеќе за Хадсон, а таа го праша дали е слободен, бидејќи „сите сакаат да знаат“.

Извор: US Weekly