
Лирој Боузман, таткото на покојниот актер Чедвик Боузман, почина на 82-годишна возраст.
Семејството во соопштението објавено во саботата, на 21 ноември, наведе дека Лирој починал во четвртокот, на 19 ноември, по кратко боледување.
Неговата смрт доаѓа повеќе од шест години по загубата на неговиот син, ѕвездата на „Црниот пантер“, и само неколку дена пред датумот на кој Чедвик ќе го прославеше својот 50-ти роденден.

Во соопштението доставено до Фокс Каролина, семејството го опиша Лирој како посветен сопруг и татко, чија љубов и насоки оставиле длабока трага во нивните животи.
„За нас тој беше многу повеќе. Беше сакан сопруг, татко и постојано присуство во приказната на нашето семејство“, порачаа неговите најблиски.
Тие се осврнаа и на заедничките спомени и на наследството што го остава зад себе, а побараа приватност и сочувство додека тагуваат.
Зад Лирој остануваат сопругата Керолин Боузман и синовите Дерик и Кевин Боузман. Според семејното соопштение, Дерик и Кевин се грижеле за татко им за време на боледувањето и биле покрај него.
Дополнителни информации за неговата болест не се објавени.
По смртта на Лирој, семејството го одложи настанот во чест на 50-от роденден на Чедвик, планиран за недела, 29 ноември. Најавија дека повеќе детали за одбележувањето ќе соопштат подоцна.
Чедвик е роден на 29 ноември 1976 година во Андерсон, Јужна Каролина. Почина во август 2020 година, на 43-годишна возраст, по битка со рак на дебелото црево, за која не зборуваше јавно.
Најпознат беше по улогата на Т’Чала во Марвеловиот „Црниот пантер“, како и по настапите во филмовите „42“, „Get on Up“ и „Ma Rainey’s Black Bottom“.
Во годините по неговата смрт, семејството продолжи да го чува споменот на него. Во март 2025 година, Лирој и Керолин присуствуваа на свеченоста по повод именувањето на Центарот за ликовни уметности „Чедвик Боузман“ при уметничката академија „Саутвуд“ во Андерсон, Јужна Каролина. Тогаш беше откриена и биста на нивниот син.
Во ноември 2025 година, Чедвик постхумно доби ѕвезда на Холивудската патека на славните, на церемонија на која присуствуваа повеќе членови на неговото семејство.
Извор: Just Jared