По осум оскаровски номинации во кариерата, Глен Клоуз доби почесен Оскар на годинешното доделување на наградите на гувернерите на Академијата. Свеченоста се одржа во неделата, на 15 ноември 2026 година, во салата „Реј Долби“ во комплексот „Овејшн Холивуд“ во Лос Анџелес.
Актерката од All’s Fair, која има 79 години, беше видно трогната додека го примаше признанието. Во обраќањето се наврати на својот живот и на детството поминато во култ.
Клоуз ѝ ја посвети наградата на својата ќерка, актерката Ени Старк, а зборуваше и за претходните осум номинации за Оскар.
„Како некој што се чувствуваше како да не припаѓа целосно на тој свет, никогаш не се оптоварував со тоа дали ќе победам, иако во некои години мислев дека имам шанса“, рече таа. „Отсекогаш сметав дека големата чест е да се биде во салата. Во изминатите 43 години, осумпати бев во таа сала… Не гледав низ прозорецот однадвор, туку бев внатре, дел од оваа извонредна заедница. Затоа, најголемата чест е што вечерва сум тука, прифатена од луѓето што постојано ме инспирирале, чија работа ми давала сила, ме предизвикувала и ме поттикнувала да бидам подобра.“
Од осумте оскаровски номинации на Клоуз, четири биле за споредна, а четири за главна женска улога. Првата номинација за главна улога ја добила во 1988 година за „Фатална привлечност“, а следната година повторно била номинирана, овојпат за „Опасни врски“. Во истата категорија се натпреварувала и во 2012 година со „Алберт Нобс“, а последната номинација ја добила во 2019 година за „Сопругата“.
Претходно овој месец, нејзиниот партнер од „Фатална привлечност“, Мајкл Даглас, во „Шоуто на Греам Нортон“ изјави дека Клоуз требало да го освои Оскарот за таа улога. Наградата во 1988 година ѝ припадна на актерката и пејачка Шер за „Месечина“.
Даглас ја опиша нејзината изведба во трилерот како „една од најдобрите актерски изведби на сите времиња“.
Клоуз, која исто така гостуваше во емисијата, на шега го прокоментира претстојното примање на почесниот Оскар: „Некако ми е жал што ќе ја прекинам низата порази“.
За одлуката на Академијата за филмски уметности и науки да ѝ го додели признанието, се пошегува дека „веројатно веќе не сакаат да чувствуваат вина“.
Извор: US Weekly