Зак Афлек ѝ го честита роденденот на ќерката откако се дозна дека Џен побарала развод

Зак Афлек ѝ го честита петтиот роденден на ќерката Нора со емотивна објава, само неколку часа откако излезе веста дека неговата сопруга Џен Афлек поднела барање за развод.

„Среќен роденден на моето девојче! Имаш огромно срце и со тебе сè е малку поволшебно. Те сакам“, напиша 30-годишниот Зак.

Џен и Зак станаа познати во 2024 година со реалното шоу на Хулу, „Тајните животи на мормонските сопруги“. Џен ќе се појави и во неговото издвоено издание, „Тајните животи на мормонските сопруги: Оринџ Каунти“, чија премиера е закажана за 12 ноември.

Брачната двојка, која припаѓа на мормонската верска заедница, во јуни објави дека го очекува четвртото дете. Еден месец подоцна, Џен проговори дека повторно се соочува со депресија во бременоста.

„Депресијата се врати и во оваа бременост. Само што овојпат е уште потешка“, напиша таа на Инстаграм на 23 јули. „Во првото тримесечје имаше многу денови кога ми доаѓаа навистина мрачни мисли. Тоа ме плашеше. А ако некогаш сте доживеале депресија, знаете колку осамено може да се чувствувате. Кога на тоа ќе се додадат преселба во друга сојузна држава, бременост и обидот да бидете тука за своите деца, некои денови ми се чинеше дека нема да издржам.“

Џен напиша дека поддршката ја добивала од „пријатели, семејство, непознати луѓе… луѓе кои немаа поим колку ми помагаа само со тоа што беа тука“.

„Ме потсетуваа дека, дури и кога не можев да ја видам светлината, не чекорев сама низ темнината“, додаде таа.

„Не мислам дека депресијата е нешто убаво. Таа е болна, збунувачка и исцрпувачка. Но верувам дека Бог може од неа да создаде нешто убаво. Ме поттикна да си поставувам подлабоки прашања. Ме натера да забавам. Ме потсети што е навистина важно. Ме научи дека понекогаш силата е во тоа да побараш помош, наместо да се преправаш дека си добро“, продолжи Џен.

Во април 2025 година, додека ја промовираше втората сезона на „Тајните животи на мормонските сопруги“, Џен зборуваше за бракот со Зак во ексклузивно интервју за „Ас викли“.

„Нашиот брак сега е сосема поинаков — разликата е како ден и ноќ“, рече тогаш. „Секој ден си велиме: ‘Ако можеме да го пребродиме ова, можеме да пребродиме сè’.“

Извор: US Weekly