Џена Ортега за животот со ОКР: Броење, повторување зборови и чекорење по строг редослед

Џена Ортега отворено проговори за своето искуство со опсесивно-компулсивното растројство, познато како ОКР.

Во ново интервју, 24-годишната ѕвезда на серијата „Венздеј“ откри дека првите знаци на растројството се појавиле кога имала седум години.

Што е ОКР?

Според клиниката „Мајо“, опсесивно-компулсивното растројство се карактеризира со несакани мисли и стравови, наречени опсесии. Тие го поттикнуваат лицето да повторува одредени постапки, познати како компулсии. Опсесиите и компулсиите го попречуваат секојдневното функционирање и предизвикуваат голема вознемиреност.

Строго утврдени ритуали уште од детството

Ортега за „Вог“ раскажа дека на седумгодишна возраст станувала рано за да изврши низа постапки по точно одреден редослед. Таа ја опиша оваа строго утврдена рутина како рана манифестација на ОКР.

„Морав да го тргнам чаршафот на одреден начин, да ја отворам фиоката на одреден начин и бавно да си ја четкам косата“, објасни актерката.

Таа рече дека понекогаш и денес ја повторува таа рутина, особено кога е под стрес или има премногу обврски.

„Едноставно се помирувам со тоа и ја извршувам рутината“, изјави Ортега.

Броење, повторување зборови и влегување со левата нога

Актерката ги опиша и ритуалите што ги практикува сега, кога е уморна, вознемирена или кога чувствува замор поради промена на временските зони.

За списанието откри дека во текот на денот ја повторува фразата „чувај се“ точно одреден број пати, на сетот стапнува прво со левата нога, а понекогаш го задржува здивот и брои до 71.

Ортега сподели и дека одела на терапија, дека и натаму работи со терапевт и дека пробала лекови.

Како што објасни, дел од притисокот ѝ се намалил откако почнала да гледа на своето ОКР како на игра.

Извор: Just Jared