Модниот свет штотуку доби една од најоригиналните и највозбудливите вести оваа година – легендарниот Џон Галијано ги здружува силите со глобалниот моден гигант ЗАРА!
Оваа соработка, која ќе трае две години, носи вистинско освежување и креативна револуција во омилениот бренд што го следат милиони фанови ширум светот.
Целта на соработката е сезонско обновување на архивата на ЗАРА, а Џон Галијано ќе го реинтерпретира секое претходно издание со својот препознатлив, драматичен и авангарден потпис. Замислете само – парчињата од претходните колекции добиваат сосема нова приказна, луксузен пресврт и кутур дух, подготвени да станат ѕвезди на секоја сезона. Колекциите ќе излегуваат редовно, а премиерата на првата од нив е планирана за септември 2026, што значи дека модниот свет веќе сега ги брои деновите до тој момент.
Џон Галијано, чиишто кариери сјаат во историјата на Диор и Мезон Мартин Маржиела, сега го носи својот магичен печат во универзумот на ЗАРА. Неговата драматична, екстравагантна и уникатна естетика ветува трансформација на познатите модели во неодоливи statement парчиња, кои комбинираат достапност на популарниот high-street бренд со софистицираност на високата мода.
Оваа одлука на брендот ЗАРА е храбар и паметен потег во момент кога модната сцена бара свежина и неочекувани соработки. Љубителите на модата и трендсетери веќе шпекулираат кои парчиња Галијано ќе ги врати во живот, а секоја сезонска колекција ветува дека ќе биде вистинско модно изненадување – полна со луксузни детали, карактер и онаа магична театарска нота по која се познати дела на Галијано.
Едно е сигурно: од септември 2026. ЗАРА повеќе нема да биде иста, а модните ентузијасти имаат причина да гледаат нагоре, затоа што кутур и high-street никогаш не биле поблиски еден до друг.
Учество во игри на среќа е дозволено за лица со 18+ години. Играј одговорно!