Том Форд се враќа на филм после една деценија – и тоа спектакуларно!

Сè што знаеме за новиот проект „Cry to Heaven“

Десет години откако за последен пат застана зад камерата, и речиси две години по неговото официјално повлекување од модната индустрија, Том Форд повторно се враќа во светот на филмот — и тоа со проект кој веќе предизвикува огромен интерес меѓу холивудските кругови. Неговиот нов филм, „Cry to Heaven“, е адаптација на истоимениот роман од познатата писателка Ен Рајс, авторката на „Хрониките на вампирот“ („The Vampire Chronicles“).

Дејството е сместено во луксузна Италија од 18 век, време на опера, моќ и елитна уметност, и ги следи приказните на двајца музичари чии патишта се вкрстуваат во свет полн со интриги, амбиција и лична жртва. Според досегашните информации, снимањето треба да започне на почетокот од 2026 година, а очекувањата веќе се на највисоко ниво.

Како и со неговите претходни филмски проекти, така и овој пат, Форд ветува длабока емоционална приказна, визуелна совршеност и софистицирана естетика — три карактеристики по кои е и препознатлив. Иако актерската екипа сè уште не е официјално потврдена, веќе циркулираат шпекулации дека Форд повторно ќе ангажира врвни холивудски ѕвезди, како што претходно направи со Колин Ферт, Ејми Адамс и Џејк Џиленхол.

Режисерскиот талент на Форд за прв пат се откри со филмот „A Single Man“ од 2009 година — интимна и поетска приказна за загуба и осаменост, која го воодушеви филмскиот свет и му донесе номинација за „Оскар“. Филмот беше опишан како „визуелна медитација за љубовта и меланхолијата“, во која секоја сцена изгледа како уметничко дело.

Седум години подоцна дојде мрачниот бисер „Nocturnal Animals“ — трилер каде што Форд успеа да комбинира гламур, немир и болна искреност. И овој филм потврди дека Том Форд не е само дизајнер со камера, туку автор со изградена филмска поетика и перфекционист кој прави спој од убавина и болка, елеганција и немир. Затоа и неговото ново враќање не се доживува како обичен експеримент, туку како враќање на уметник кој знае како да претвори секоја емоција во кадар, а секоја сцена во моден едиторијал што дише со филмски живот.

Во „Cry to Heaven“ очекувајте токму тоа — естетика како од ренесансна слика, оперска драма и совршено контролирана страст.

Ако судиме според неговите претходни дела, Форд овој пат повторно ќе ни понуди филм кој не е само приказна, туку искуство што се живее.

Филм што ќе сакаме не само да го гледаме — туку и да го носиме!