Тим од вработени во НП Шар Планина и Јавната Установа Зоолошка градина на град Скопје имаше успешна интервенција на територијата на споменатиот национален парк.
Во бачило на жител од шарпланинското село Бозовце, вработените ослободија мечок кој бил заглавен во сајла околу 10 часа. Мечокот како што пишува во објавата на НП Шар Планина бил изморен и исплашен, а по 3 часовна акција успешно ослободен.
Установите за заглавениот мечок биле информирани од сопственикот на бачилото.
„Мечките се строго заштитени жители на Шар Планина, а локалното население од планинските села живее во соживот со природата. Упатуваме благодарност до сопственикот на бачилото кој го пријави настанот за да се ослободи мечокот.Благодарност и до полициските службеници за напорите да го обезбедат теренот, како и до сите други надлежни институции со кои се координираше акцијата,“, велат од установата Шар Планина.
Се зачестија случаите на симнување на мечките до населените места и бачилата на Шара, најверојатно во потрага по храна.
