Шанса да станеш YouTuber! Приклучи се! ↓↓↓
Бившиот министер за внатрешни работи, Наќе Чулев, на социјалните мрежи објави статус во кој објави колку ја чинат државата платите на директорите на трите државни агенции од безбедносниот сектор.
Во само еден месец од парите на граѓаните се издвојуваат скоро 10.000 евра за нивните плати. Просечната плата на секој од нив согласно законски утврдениот коефициент и другите додатоци, е околу 3 илјади евра, на месечно ниво.
Тој вели дека кога граѓаните едвај врзуваат крај со крај, вкупната сума која државата ја двои секој месец за плати за само три лица односно Директорите на Агенција за национална безбедност, Агенцијата за разузнавање и Оперативно техничката агенција, изнесува 600.000 денари. На годишно ниво, само за директорите на овие три институции се трошат речиси 7.200.000 денари.
Платата на секој овие три директори е повисока дури од платата на претседателот на државата и премиерот, вели Чулев.
„Сите ние плаќаме илјадници евра за плати на луѓето кои се возат во луксузни и скапи возила, кои имаат цела армија обезбедувања и возачи, јадат скапи ручеци и единствено нешто што направија се низата скандали поврзани со безбедносните сертификати, спорните државјанства и пасоши на белосветски криминалци и фактот дека го доведоа безбедносно – разузнавачкиот систем во катастрофално, лоша состојба во каква што не бил во изминатите 30 години, сериозно нарушувајќи ги безбедносните капацитети на Македонија кои имаат основна цел зачувување на уставниот поредок на државата и територијалниот интегритет“, вели Чулев во објавата.
Како што додаде ЕУ и НАТО бараат одговорни, едуцирани и докажани професионалци на раководни позиции со високи морални вредности и интегритет, а астрономските плати се само начин на кој оваа власт продолжува да го осиромашува народот и да ја руши економијата на државата.
Извор: Макфакс
