Кој ќе тепа на Ел Класико!? ↓↓↓
Големата порота на Менхетн донесе одлука да биде поднесено обвинение против Доналд Трамп, објави Ројтерс.
Ова е прв пат во историјата некој актуелен или поранешен претседател на САД да се соочи со кривично гонење.
Причина за обвинението е исплатата на скриени пари и заташкување на случајот со порноактерката Сторми Даниелс.
Целата истрага се фокусираше на исплата од 130.000 долари што Мајкл Коен, поранешниот адвокат на Трамп, ја извршил до порноѕвезда во последните денови од кампањата на Трамп во 2016 година.
Обвиненијата, кои произлегуваат од истрагата предводена од окружниот обвинител на Менхетн, Алвин Брег, би можеле да ја преобликуваат претседателската трка во 2024 година.
„Јас сум целосно невин“, рече Трамп.
Тој рече дека обвинението е „политички прогон и мешање во изборите“.
Трамп претходно изјави дека ќе продолжи да води кампања за републиканската номинација доколку биде обвинет.
Конкретните обвиненија сѐ уште не се познати, а обвинението ќе биде објавено во наредните денови. Во тој момент, Трамп ќе мора да отпатува во Менхетн заради земање отпечатоци и друга обработка.
„Нека победат вистината и правдата. Нема причина за радост“, рече бранителот на Сторми Даниелс, адвокатот Кларк Брустер.
Трамп (76) бараше реизбор во 2020 година, но беше поразен на изборите од демократскиот кандидат Џозеф Бајден.
Трамп лажно тврдеше дека изгубил од Бајден поради изборна измама и ја нарече истрагата што доведе до неговото обвинение „политички лов на вештерки“.
Личниот адвокат на поранешниот претседател, Мајкл Коен, рече дека Трамп тајните плаќања ги вршел кон Даниелс и кон друга жена, поранешниот модел на Плејбој, Карен Мекдугал, која исто така изјавила дека имала секс со него. Трамп негираше дека имал афера со која било жена.
Федералните обвинители ја истражуваа исплатата на Даниелс во 2018 година, што доведе до затворска казна за Коен, но без обвиненија против Трамп.
Ниту еден поранешен или сегашен претседател на САД никогаш не се соочил со кривична пријава. Трамп, исто така, се соочува со две кривични истраги од специјален обвинител назначен од американскиот јавен обвинител Мерик Гарланд и една од локален обвинител во Џорџија.
Трамп беше претседател на САД од 2017 до 2021 година, владеејќи како десничарски популист. Тој беше двапати отповикуван од Претставничкиот дом, еднаш во 2019 година за неговото однесување во врска со Украина и повторно во 2021 година за нападот на неговите поддржувачи врз Капитол Хил. Двата пати беше ослободен во Сенатот.
Трамп моментално води во раната трка за претседателска номинација на неговата партија, а според анкетата на Ројтерс/Ипсос во февруари, тој има поддршка од 43 отсто од републиканците, во споредба со 31 отсто од неговиот главен ривал, гувернерот на Флорида, Рон Десантис, кој сѐ уште ја нема објавено својата кандидатура.
На 18 март, Трамп напиша на социјалните мрежи дека очекува да биде уапсен на 21 март и ги повика своите приврзаници да протестираат за „да ја вратиме нашата нација“, потсетувајќи на неговите совети пред нападот на Капитол на 6 јануари 2021 година.
Пред обвинението, некои водечки републиканци го обвинија Брег за политички мотивирано селективно гонење. Претседателот на републиканскиот Претставнички дом, Кевин Мекарти, тоа го нарече „безобразна злоупотреба на моќта од страна на радикалниот обвинител“ и најави истрага во Конгресот за тоа дали федералните средства се користат за поддршка на Бреговата истрага и „поткопување на нашата демократија“.
Тројцата претседатели на републиканскиот комитет на Претставничкиот дом побараа од Брег да им ги достави документите и сведочењата за истрагата.
Канцеларијата на Брег на 23 март објави дека Трамп создал „лажно очекување“ дека ќе биде уапсен.
Трамп, потсетува Ројтерс, во 2018 година првично негираше дека знаел нешто за исплата на пари на Даниелс. Подоцна призна дека му ја надоместил уплатата на Коен, која ја нарече „едноставна приватна трансакција“.
Во 2018 година, Коен се изјасни за виновен за прекршување на финансирањето на кампањата за неговата улога во исплатите на Даниелс и Мекдугал и беше осуден на три години затвор. Тој сведочеше дека Трамп го упатил да ги изврши плаќањата.
На 13 март Коен сведочеше пред големата порота на Менхетн, која го истражуваше Трамп. Големата порота го сослуша и Дејвид Пекер, поранешниот издавач на таблоидот Нешнел енкваерер, кој ги купил правата на приказната на Мекдугал за нејзината наводна афера со Трамп за 150.000 долари, која никогаш не беше објавена, метод познат како „фати и убиј“, кој го користат некои медиумски куќи за да закопаат штетни информации за трета страна.
Даниелс рече дека имала секс со Трамп во хотел на езерото Тахо во 2006 година – една година откако тој се ожени со сегашната сопруга Меланија и повеќе од една деценија пред бизнисменот што стана политичар да стане претседател.
Во 2021 година, Врховниот суд на САД го отфрли нејзиниот обид да ја оживее тужбата за клевета што ја покрена против Трамп поради твитот во кој ја обвинуваше за „измама“. Пониските судови ја отфрлија нејзината тужба.
Во случајот што доведе до осуда на Организацијата Трамп по обвиненијата за даночна измама, Брег одби да го обвини самиот Трамп за финансиски неправилности поврзани со неговите деловни практики, поради што двајца обвинители што работеа на истрагата поднесоа оставка.
Фани Вилис, окружна обвинителка во округот Фултон, Џорџија, исто така го истражува Трамп, за тоа дали поранешниот американски претседател незаконски се обидел да го поништи својот изборен пораз во 2020 година во таа држава.
Специјалниот советник Џек Смит конкретно го истражува ракувањето на Трамп со доверливите владини документи откако тој ја напушти функцијата и неговите напори да ги поништи резултатите од изборите во 2020 година.
