Мајка обвинета дека ја лажела полицијата додека нејзината четиригодишна ќерка умирала од труење со фентанил

Жена од американската сојузна држава Масачусетс е обвинета по смртта на својата четиригодишна ќерка, за која властите утврдиле дека починала од труење со фентанил. Според обвинителството, Дајана Фамилија од Бостон ги лажела полицајците и медицинската екипа кои на 17 август се обидувале да му помогнат на девојчето.

На судското рочиште во понеделникот, 26 октомври, обвинителството изнело тврдење дека нејзиното однесување ги попречило обидите за спасување на детето.

„Иако ја знаела вистинската причина за здравствената состојба на детето, таа ги доведувала во заблуда полицајците и екипата на итната помош. Со тоа ги попречувала постапките за спасување и медицинските интервенции што екипата се обидувала да ги изведе за да ѝ го спаси животот на нејзината ќерка“, изјавила помошничката на окружниот обвинител во Сафолк, Алисон Портни, пренесува „Бостон 25 њуз“.

Бостонската полиција ја уапсила Фамилија во Дедам во саботата, 24 октомври, врз основа на претходно издаден налог за апсење од Дорчестер.

Според полициското соопштение, таа се товари за убиство без умисла, поседување дрога од класа А, уништување докази и намерно доведување истражител во заблуда во текот на кривична истрага.

Нејзината ќерка била прогласена за мртва на 17 август, откако полицајците што пристигнале по повик за итна медицинска помош ја затекнале без свест во дом во Дорчестер.

Полицијата соопштила дека обдукцијата покажала оти причина за смртта е „акутно труење со фентанил“.

Според „Бостон 25 њуз“, полицајците подоцна пронашле фентанил во домот.

На рочиштето Фамилија се изјаснила дека не е виновна. Медиумот го објавил и името на нејзината ќерка — Лијана Баутиста Фамилија.

Според извештајот, судот одредил кауција од 250.000 долари, како што побарало обвинителството. Нејзината бранителка, Розалинда Рефсланд, побарала кауцијата да изнесува 10.000 долари.

„Госпоѓа Фамилија нема криминално досие и не сметаме дека претставува опасност за заедницата. Против неа никогаш не било покренато обвинение и нема ниту една осудителна пресуда“, изјавила Рефсланд, според „Бостон 25 њуз“.

По смртта на Лијана, Анаис Мерседес, која се претставила како тетка на девојчето, отворила кампања на платформата GoFundMe за помош на семејството.

Извор: US Weekly