Ламеларната вода сè почесто наоѓа место во рутината за нега на косата, особено кај оние што сакаат мазна, мека и сјајна коса без посета на салон. Овој лесен третман се плакне, а наменет е за коса на која ѝ недостигаат мазност и сјај. Практичен е затоа што делува за само неколку секунди. За разлика од вообичаените маски и регенератори, има течна текстура и не ја отежнува косата, па може да им одговара и на оние што избегнуваат побогати формули.
Ако косата ви изгледа безживотно, лесно се заплеткува или по миењето ѝ недостига оној мазен, сјаен изглед, ламеларната вода би можела да биде корисно дополнување на вашата нега.

Што е ламеларна вода и како делува?
Станува збор за лесен третман за нега што се нанесува по миењето со шампон, а потоа се плакне со вода. Неговата особеност е таканаречената ламеларна технологија. Наместо да дејствуваат како класичен регенератор со богата текстура, овие формули содржат состојки за нега и омекнување што се распоредуваат по површината на влакното и помагаат во неговото измазнување.
Кога површината на влакното е груба и нерамна, светлината не се одбива рамномерно, па косата може да изгледа безживотно и без сјај. Измазнувањето ѝ дава поизедначен изглед, го олеснува расчешлувањето и го зголемува сјајот. Токму затоа ламеларната вода се користи за постигнување на таканаречениот ефект на стаклена коса — мазна, сјајна и негувана.

За каква коса е наменета?
Овој третман најмногу ѝ одговара на сува коса, груба на допир, склона кон заплеткување или со изгубен природен сјај. Наменет е и за коса што често се обликува со фен, пегла или фигаро, како и за бојадисана и бланширана коса.
Една од предностите на ламеларната вода е лесната текстура. Поради тоа, може да биде добар избор и за тенка коса, која класичните маски понекогаш ја отежнуваат. Сепак, кај многу сува или оштетена коса можеби нема да биде доволна како единствен третман, па може да се комбинира со регенератор или маска.
Ламеларна вода или маска за коса?
Иако и двата производа служат за подобрување на изгледот и текстурата на косата, нивната намена не е сосема иста. Класичните маски обично имаат побогата текстура и обезбедуваат поинтензивна нега. Ламеларната вода, пак, е полесен третман насочен кон измазнување, полесно расчешлување и поголем сјај.
Тоа не значи дека мора да се одлучите само за едниот производ. Ако косата ви е многу сува, можете да продолжите со употреба на маска, а ламеларната вода да ја вклучите како дополнителен третман кога сакате помазен изглед и повеќе сјај. За тенка коса, на која богатите формули често не ѝ одговараат, полесната текстура може да биде попрактично решение.
Ламеларната вода е едноставно дополнување на негата со кое косата може да стане помека, помазна и посјајна во домашни услови. Нанесувањето не е сложено, а брзото дејство ја прави практична опција кога сакате да ѝ посветите дополнителна нега на косата.
Извор: Lepota i Zdravlje