Хари порача дека децата заслужуваат безбедност по апсењето на таткото на Меган Маркл

Принцот Хари, 42, ја нагласи важноста на безбедноста на децата на интернет во своето прво јавно обраќање откако таткото на неговата сопруга Меган Маркл беше уапсен под сомнение за поседување материјали со сексуална злоупотреба на деца.

„Секое дете треба да може на интернет да открие нешто прекрасно. Пријател. Интерес што ќе прерасне во страст. Место каде што ќе се чувствува разбрано“, порача Хари.

Војводата од Сасекс сам го одржа говорот пред Европскиот парламент. Според Би-би-си и „Скај њуз“, било предвидено и Меган да се обрати заедно со него, но таа, според нивните информации, не се чувствувала доволно емоционално подготвена. Наместо да говори, го следеше обраќањето на сопругот од првиот ред.

Таткото на Меган, Томас Маркл постариот, со кого таа е во нарушени односи, беше уапсен на Флорида во петокот, на 6 ноември, по федерално обвинение за поседување детска порнографија. Истиот ден беше пуштен на слобода со кауција.

Федералното обвинителство за Централниот округ на Калифорнија во петокот соопшти дека истражителите пронашле материјали со сексуална злоупотреба на деца во два магацински простора во областа на Лос Анџелес, регистрирани на име на 82-годишниот Томас Маркл.

Според обвинителите, меѓу материјалите има и фотографии на маж за кого се верува дека е таткото на Меган, со голо девојче на претпубертетска возраст.

„ФБИ и нашите партнери го уапсија Томас Маркл постариот откако истрагата на ФБИ покажа дека поседувал материјали со сексуална злоупотреба на деца“, изјави директорот на ФБИ, Каш Пател, во соопштение во петокот.

„Господинот Маркл, според сомневањата, таргетирал невини деца и со своите криминални постапки се обидел да им ја одземе невиноста. Во соработка со нашите партнери од Министерството за правда, нашите агенти брзо дејствуваа, ги идентификуваа и ги пронајдоа експлицитните материјали и го уапсија господинот Маркл на Флорида“, продолжи Пател.

„ФБИ ќе ги искористи сите расположливи ресурси за да ги заштити невините деца. Ниту еден предатор што таргетира деца нема да најде безбедно засолниште во оваа земја, ниту каде било на друго место каде што ќе се обиде да се скрие“, додаде тој.

Минатиот месец, полубратот на Меган, Томас Маркл помладиот, за весникот „Сан“ тврдеше дека во домот на својот татко на Филипините пронашол кутии со материјали за кои се сомневал дека прикажуваат сексуална злоупотреба на деца. Тој рече дека ги предал на локалните власти. Томас Маркл постариот ги негираше обвинувањата дека поседувал такви материјали.

Во тогашната изјава за „Ас викли“, Меган порача: „Длабоко сум вознемирена од вестите што излегоа на виделина во изминатите 24 часа и моите мисли се со сите деца што можеби биле повредени“.

Извор: US Weekly