Николас Кејџ објасни зошто рекол дека е „малку бездомник“: „Не сме останале без средства“

Николас Кејџ ја појасни својата неодамнешна изјава дека е „малку бездомник“, откако под неговиот имот покрај плажата во Малибу се отвори голема дупка и куќата претрпе сериозни оштетувања.

Шеесет и двегодишниот актер од „Лонглегс“ зборуваше за Асошиејтед прес на премиерата на „Маден“. Во интервјуто објавено на 4 ноември објасни што сакал да каже.

„Бев на Комик-кон и спонтано разговарав со еден многу добар новинар. Бидејќи беше Ноќта на вештерките, мораше да ме праша: ‘Што ќе правите вечерва?’ Кога го кажав тоа, мислев дека во мојата куќа не можам да ги пречекам децата што доаѓаат по слатки“, рече Кејџ.

„Сега морам да внимавам буквално на секој збор. Задоволни сме. Добро сме. Не сме останале без средства. Сè е во ред. Само сакав да кажам дека куќата не може да се украси и дека таму не можам да им делам слатки на децата, нешто што сакам да го правам бидејќи ја сакам Ноќта на вештерките“, додаде тој.

Кејџ претходно, на Комик-кон во Лос Анџелес на денот на Ноќта на вештерките, изјави дека „моментално е малку бездомник“, бидејќи неговата куќа не е безбедна за живеење.

Според „Пејџ сикс“, неговиот дом вреден 10,5 милиони долари во септември претрпел големи оштетувања. Силната ерозија на крајбрежјето и обилните дождови предизвикале тонење на земјиштето. На фотографиите се гледа огромна дупка на местото каде што претходно бил приодот до куќата.

„Затоа сега престојувам по хотели и вечерва нема да можам, како обично, да ги пречекам децата што доаѓаат по слатки, а тоа би ме израдувало“, рече тој на настанот.

Во дупката пропаднале затворената гаража, делови од асфалтот и бетонот, како и преносен тоалет од блиското градилиште и делови од оградата што го штитела имотот од погледи. Морале да бидат евакуирани и соседите на Кејџ, а седум куќи на улицата биле означени како небезбедни.

Сепак, актерот од „Национално богатство“ не дозволил тоа да му ја расипе Ноќта на вештерките. Кажа дека планира со четиригодишната ќерка Огуст да собира слатки во Санта Моника, а откако ќе ја стави на спиење, да го гледа хорор-класикот „Сјаење“.

„Пејџ сикс“ објави и дека Кејџ вложува големи напори за да ја спаси куќата. Во рок од неколку дена по инцидентот поднел барања за три дозволи, меѓу кои и итна градежна дозвола. Со неа му е одобрено да постави вреќи со песок долж плажата и околу надворешниот дел на куќата, за заштита од брановите и за спречување натамошна ерозија на крајбрежјето.

Извор: Just Jared