Трамп: Републиканците ќе победеа убедливо ако и моето име беше на гласачкото ливче

Американскиот претседател Доналд Трамп тврди дека републиканците ќе победеле на конгресните избори во 2026 година доколку и неговото име било на гласачкото ливче.

„Јас не бев на гласачкото ливче, а да бев, ќе победевме СО ОГРОМНА РАЗЛИКА! Ви благодарам за вниманието посветено на ова прашање. Претседател ДОНАЛД Џ. ТРАМП“, напиша 80-годишниот Трамп.

Во интервју за „Фокс енд френдс“, Трамп тврдеше: „Имам поддршка од 99 проценти. Имам највисок рејтинг на одобрување од кого било во историјата“. Сепак, според анкета на Си-ен-ен спроведена од 13 до 26 октомври, 64 проценти од Американците не ја одобрувале неговата работа.

Во истото интервју, претседателот зборуваше и за американската воена помош за Израел, оценувајќи дека на земјата повеќе не ѝ е потребна.

„Израел ни е на прво место. Ним им даваме повеќе отколку на која било друга земја, а повеќе не им е потребно“, рече Трамп во телефонското вклучување во живо. „Го правиме тоа со години. И јас го правам тоа. Но Израел е земја што одлично напредува. Не им е потребна помошта. Да им беше потребна, ќе кажев да продолжиме“.

Во пресрет на изборите, Трамп се осврна и на теми надвор од политиката, зборувајќи за изгледот на членовите на својата администрација. Во епизодата на подкастот „Под форс уан“, објавена во понеделникот, на 2 ноември, водителката Миранда Дивајн го праша кого го издвојува како најпривлечен. Тој ги наведе потпретседателот Џеј Ди Венс, државниот секретар Марко Рубио и секретарот за финансии Скот Бесент.

„Кој од тие тројца? Или некој друг? Пит Хегсет?“, продолжи со прашањата 65-годишната Дивајн, споменувајќи го 46-годишниот секретар за војна. Трамп се насмеа и рече дека таквите прашања би можеле да му создадат проблеми.

„Пит е згоден маж“, додаде тој. „Ќе ме доведете во голема неволја со овие прашања. Зошто го правите тоа? Мислам дека сите изгледаат одлично“.

На крајот, претседателот објасни: „Ќе ви кажам нешто, Марко е навистина одличен и актуелен политичар, во смисла дека одлично си ја заврши работата. Истото важи и за Џеј Ди. Сите работат одлично. Скот Бесент е како избран на кастинг, нели? Да снимав филм за Министерството за финансии, нему ќе му ја дадев главната улога. Сите се добри“.

Извор: US Weekly