Меки, лесни и впечатливи: џемперите од мохер внесуваат елеганција во студените денови

Џемперите од мохер се издвојуваат од вообичаените плетени модели што ги носиме во студените месеци. Доволно се впечатливи за да ја разиграат и наједноставната облека, но истовремено изгледаат опуштено и лесно се вклопуваат во секојдневниот стил. Нивната мека, воздушеста текстура, нежниот сјај и меките линии ги прават поинакви од класичните волнени џемпери.

Со темни фармерки и кожни чизми изгледаат полежерно, додека во комбинација со панталони со широки ногавици или сатенско здолниште добиваат софистициран изглед.

@camilagizz

По што е посебен мохерот?

Мохерот е природно влакно што се добива од влакната на ангорската коза. Ценет е поради спојот на мекост, сјај и исклучителна леснотија. За разлика од класичната волна, има мазна површина и препознатлив свиленкаст отсјај, а фините влакна му го даваат оној воздушест, мекичок изглед по кој се препознаваат џемперите од мохер. Овој материјал добро ја задржува топлината, па обезбедува удобност и во постудените денови, без чувството на тежина што понекогаш го имаат класичните волнени џемпери.

Токму спојот на практичност и убав изглед го прави интересен за есенската и зимската гардероба. Од мохер се изработуваат тенки, воздушести џемпери и кардигани, но и побујни модели со поголем волумен. Често се меша со волна или со други влакна за да се постигнат посакуваната текстура, еластичност и издржливост.

Неговата текстура му дава карактер дури и на наједноставниот дизајн. Особено доаѓа до израз кај еднобојните џемпери, па на моделите во кремова, сива или чоколадна нијанса не им се потребни дополнителни детали за да бидат забележливи. Кога материјалот и кројот добро се надополнуваат, остатокот од облеката може да остане сосема едноставен.

@hannajanic

@hannajanic

Неутрални нијанси или впечатливи шари

За оние што претпочитаат облека која лесно се комбинира, мохерот во неутрални тонови е едноставно решение. Кремовата, сивата, бежовата и кафеавата боја лесно се вклопуваат во секојдневните изданија. Пругите, деталите со контрастни блокови бои и спојот на повеќе тонови, пак, внесуваат динамика во есенската и зимската гардероба.

Џемперите во бордо, темнозелена, пудресто розова или интензивна сина нијанса се начин да се внесе боја во зимските комбинации. Не мора да се носат со други впечатливи парчиња: едноставни панталони и дискретни модни додатоци често се сосема доволни.

@tinvcb

@tinvcb

Како да ги вклопите во есенските комбинации

Иако оставаат луксузен впечаток, џемперите од мохер не се наменети само за посебни пригоди. Со фармерки, едноставна чанта и чизми создаваат убава дневна комбинација. Со панталони со широки ногавици и елегантни чевли со потпетици, пак, изгледаат поформално.

Ова меко плетиво создава интересен контраст со облека со јасни линии и нагласен крој. Сако со прав крој, кожна јакна или едноставен капут внесуваат рамнотежа и го ублажуваат романтичниот впечаток на џемперот од мохер. За вечерни пригоди интересен е и спојот со сатен, бидејќи различните текстури создаваат впечатлив визуелен ефект.

Извор: Lepota i Zdravlje