Џенифер Лоренс за враќањето како Мистик: „Никогаш не вели никогаш, ама апсолутно ебено не“

Џенифер Лоренс очигледно нема голема желба повторно да ја игра Рејвен Даркхолм, позната како Мистик, ниту во филмскиот универзум на Марвел ниту во некој друг проект од серијалот „Икс-мен“.

Триесет и шестгодишната оскаровка го толкуваше ликот во четири филма од 2011 до 2019 година: „Икс-мен: Прва класа“, „Икс-мен: Денови на идното минато“, „Икс-мен: Апокалипса“ и „Темниот Феникс“.

Во неодамнешно интервју за „Алур“, актерката беше прашана дали би се вратила во улогата, односно дали повторно би прифатила обемна трансформација со протетички додатоци каква што бараше изгледот на Мистик.

Нејзиниот одговор беше недвосмислен

„Никогаш не вели никогаш, ама апсолутно ебено не“, одговори таа без заобиколување. „Знаете колку е студено кога ве прскаат со боја со аерограф? А јас сум скокотлива. Научив со колку малку сон можам да функционирам и што може да му се случи на човечкиот ум кога навистина ќе стигнете до границата на издржливоста. И научив да бидам трпелива!“

Лоренс и претходно зборувала за тоа колку не ѝ се допаѓала долгата постапка на шминкање и нанесување протетички додатоци. Темата ја спомена и на тркалезна маса со актерки во декември 2025 година, на која учествуваше и Синтија Ериво, која за „Злобница“ мораше да биде обоена во зелено. Во 2014 година, во периодот кога излезе „Денови на идното минато“, Лоренс во гостување во „Тунајт шоу“ раскажуваше и за „велосипедското седиште“ на кое морала да седи додека траела трансформацијата.

Актерката откри дека најмногу уживала во каскадерските сцени и во учењето на движењата на ликот. Притоа ја пофали својата каскадерска двојничка Рене Манимејкер, која ги изведувала и каскадерските сцени за Кетнис во „Игрите на гладните“.

Сепак, како што рече, „бојата дефинитивно беше делот што најмалку го сакав“.

Слично искуство опиша и при неодамнешното гостување во подкастот „Кол хер деди“. Таму кажа дека постапката траела „по осум часа секојпат“ и дека ја скокоткала поради сета „боја за тело и лепило“.

Предизвик биле и самите подготовки: во еден ден морала да ја обои косата во повеќе бои, поради што таа останала трајно оштетена.

Извор: Just Jared