Роб Фили од „Love Is Blind“ проговори за испадите по кои му пропадна свршувачката

Роб Фили двапати ги загуби нервите во епизодите од 11. сезона на „Love Is Blind“ објавени неделава.

Четириесетгодишниот продавач на инфраструктурни решенија за вештачка интелигенција првиот испад го имаше додека беше излезен со свршеницата Михаела и со своите пријатели. Откако ресторанот одби да им послужи уште алкохол, тој побара снимањето да запре.

Потоа повторно избувна на заедничко излегување со другите учесници во емисијата. По тој настан, Михаела ја раскина свршувачката, иако тој подоцна ѝ се извини.

Во ново интервју, Роб раскажа што се случувало на таа дружба.

Во разговор за „Тудум“, тој призна дека неговото однесување било несоодветно и дека дозволил емоциите и притисокот од експериментот да го совладаат.

„Веројатно требаше да постапам позрело и да не ги изгубам нервите“, рече тој. „Ме фрустрираше тоа што камерите постојано ми беа пред лице.“

Додаде дека се почувствувал навреден кога Михаела насамо му кажала дека се однесува агресивно.

„Никогаш во животот не би бил агресивен кон девојка“, изјави Роб.

Што се однесува до дружбата со другите учесници, на која изгледаше вознемирено по повторната средба на Михаела со Мет, со кого претходно се зближила во кабините, Роб тврди дека неговата реакција повеќе се должела на впечатокот дека сите се однесуваат „лажно“, отколку на љубомора.

„Мислев дека сè е обична глупост“, рече тој. „Знам дека луѓето најдоа љубов, но во тој момент мислев дека сето тоа е само за емисијата. Сè е за пред камера.“

Токму на забавата, вели Роб, навистина станал свесен за ситуацијата во која се наоѓа, вклучително и за можноста на венчавката да не го изговорат судбоносното „да“.

„Чувствував дека сè се руши“, рече тој. „Ги разочарував сите.“

„Можев да постапам малку поинаку кон крајот, но во мојот живот имаше многу анксиозност, многу притисок“, изјави Роб. Тој се осврна на смртта на својот татко непосредно пред емисијата, како и на загубата на двајца блиски пријатели во годината и пол пред тоа.

Кога сега се навраќа на случувањата, посакува да останел смирен и поприсебен.

„Ако повредив некого, тоа не ми беше намерата“, рече тој.

„Сите сме луѓе и, претпоставувам, едноставно треба да продолжиме да работиме на себе за да бидеме подобри“, додаде Роб. „Јас знам кој сум кога наутро ќе се погледнам во огледало, а ако Америка не знае, тоа е нивна работа.“

Извор: Just Jared