Плетениот елек повторно е есенски фаворит: идеи за лесно и впечатливо комбинирање

Плетениот елек сезонава ги надминува рамките на класичниот колеџ-стил и отвора простор за поразиграни комбинации. Може да се носи врз бела кошула, тенка ролка или маица со долги или кратки ракави, а убаво изгледа и самостојно, со панталони со висок струк. Оваа есен се издвојуваат моделите со V-израз, необични шари и нагласена текстура, но и елеците со полуролка, кои се доволно елегантни за на работа. Изборот на модели е разновиден, а можностите за нивно вклопување во секојдневната гардероба се многубројни.

@zeinkurdi

Различни кроеви и материјали за есенските денови

Понудата на плетени елеци опфаќа различни материјали и кроеви, па лесно може да се избере модел според личниот стил и времето. Волната и кашмирот се добар избор за постудените денови, додека потенките плетива се практични за слоевито облекување. Класичниот V-израз одлично се вклопува со кошула, а елеците со полуролка или кружен израз доаѓаат до израз врз маици со долги или кратки ракави. Пошироките модели создаваат поопуштен изглед, додека кратките, струкирани елеци убаво се комбинираат со панталони и здолништа со висок струк. Моделите со ромбови, изразена ребреста плетка или други шари можат да бидат и главниот акцент на целата комбинација.

Massimo Dutti

Reserved

Zara

Како да го комбинирате плетениот елек оваа есен?

Белата кошула и плетениот елек се есенска класика, но оваа спојка не мора да изгледа строго или предвидливо. Елек со V-израз, кошула со рамен крој, фармерки и мокасини создаваат опуштена комбинација погодна и за во канцеларија. За поелегантен изглед, наместо фармерки облечете панталони и дополнете ги со ремен. Доколку елекот е впечатлив, другите парчиња можат да бидат едноставни. Токму тука е неговата предност: со само еден дополнителен слој и најобичната кошула добива поинаков изглед.

Во постудените денови, елекот може да се носи врз тенка ролка. Така се добива простор за комбинирање бои и текстури, без облеката да изгледа пренатрупано. Црн или сив елек лесно се спојува со ролка во крем, бордо или чоколадна нијанса, додека посветлите модели создаваат контраст со темни панталони.

@evgeniya.buraya

@zeinkurdi

За едноставна секојдневна комбинација, фармерките се сигурен избор. Светол елек со темносин тексас дава класичен изглед, а модел во кафеава, бордо или маслинеста нијанса внесува топлина во есенската гардероба. И обувките значително го менуваат впечатокот: мокасините и чизмите ја прават комбинацијата поелегантна, додека патиките ѝ даваат полежерен карактер.

Сепак, кошулата и ролката не се задолжителни. Елеците што се доволно затворени и убаво ја следат силуетата можат да се носат самостојно, со панталони со висок струк или со миди здолниште. За смирен, ненаметлив изглед, комбинирајте блиски нијанси. Ако сакате елекот да биде во центарот на вниманието, направете контраст меѓу горниот и долниот дел од облеката.

Извор: Lepota i Zdravlje