Меган Маркл се огласи за истрагата против нејзиниот татко: За вознемирувачките наводи дознала во 2018 година

Меган Маркл се огласи по медиумските извештаи за истрагата против нејзиниот татко, Томас Маркл, со кого со години има нарушени односи.

Според информациите што Пипл ги пренесе на 23 октомври, повикувајќи се на Сан, кај 82-годишниот Маркл биле пронајдени недозволени материјали.

Братот на Меган, Томас Маркл Помладиот, наводно пронашол четири големи кутии со „стотици, ако не и илјадници“ фотографии со сексуална злоупотреба на деца во домот на нивниот татко во Себу, на Филипините. По ова била отворена истрага за поседување такви материјали.

„Од она што го видов ми се слоши — сето тоа ми беше оставено и не знаев што да правам“, изјавил Томас Помладиот. „Веднаш знаев дека е строго незаконско и дека би можел да завршам во затвор на долго време ако не се ослободам од него. Се чувствував изневерено, луто и згрозено — и сфатив дека морам да го пријавам.“

Во изјава за Пипл, Меган рече дека е длабоко потресена од информациите објавени во изминатото деноноќие.

„Длабоко сум вознемирена од вестите што излегоа на виделина во последните 24 часа и мислите ми се со сите деца што можеби биле повредени“, изјави таа. „Во 2018 година беше испратено писмо до лондонската Метрополитенска полиција и службата за заштита на кралското семејство и специјализирана заштита. Тоа писмо подоцна ми беше дадено на увид. Во него беа изнесени загрижувачки и вознемирувачки наводи против мојот татко и добив уверувања дека тие се истражуваат.“

Меган продолжи: „Се надевам дека сега ќе стане јасно оти, и покрај искривувањето на приказната од одредени медиуми низ годините, моето дистанцирање од татко ми и одлуката да не му дозволам контакт со нашите деца имаа само една причина: да ги заштитам.“

„Верував дека властите го прават истото за другите семејства. Иако размерите на она што сега е откриено се пострашни од сè што човек би можел да замисли, мојата најискрена надеж е дека правдата ќе биде целосно задоволена и дека безбедноста и заштитата на невините деца ќе останат приоритет“, додаде таа.

Минатата година, на Томас Маркл Постариот итно му била ампутирана ногата. И покрај долгогодишното отуѓување и прекинатата комуникација, портпаролот на Меган тогаш потврди дека таа стапила во контакт со него по операцијата.

Извор: Just Jared