Кадифето со ребреста текстура повторно е во тренд, а овие комбинации го потврдуваат тоа

Текстурите се особено интересни оваа зимска сезона, а по жакардот, кој од модните колекции се пресели и во секојдневната гардероба, вниманието го привлекува уште еден материјал со богата структура – кадифето. Овојпат во преден план е ребрестото кадифе, кое на добро познатите парчиња облека им дава нова димензија и внесува доза ретро естетика во современите комбинации. Неговата карактеристична површина, мека структура и изразени линии го прават одличен избор за постудените денови, кога сакаме да си поиграме со материјалите и да создадеме поинтересен изглед без премногу детали.

Од панталони и сакоа до здолништа, фустани и јакни, овој материјал лесно се вклопува во различни стилови – од лежерни дневни комбинации до поелегантни изданија. Иако често го поврзуваме со ретро модата, ребрестото кадифе денес изгледа современо, особено кога се комбинира со едноставни парчиња и модерни кроеви.

Ребрестото кадифе како клучно парче во комбинацијата

Еден од наједноставните начини да го прифатиме овој тренд е да избереме панталони од ребресто кадифе. Моделите со прави ногавици или со малку поширока силуета се особено практични, бидејќи лесно се комбинираат со различни парчиња. За секојдневен изглед можеме да ги носиме со бела маица, плетен џемпер и патики, додека комбинацијата со кошула, кожен ремен и мокасини ќе делува посреедено. Кафеавите, маслинестите, бордо и тегет моделите се одличен избор за есенската палета на бои.

Сако од кадифе исто така заслужува место во гардеробата. Наместо класичен волнен модел, можеме да избереме ребресто кадифе во топла кафеава или темнозелена нијанса и да го носиме со фармерки и едноставен топ. За поелегантна варијанта, доволно е да го споиме со панталони со чисти линии и обувки со потпетица. Важно е остатокот од комбинацијата да биде поедноставен, за текстурата на кадифето да дојде до израз.

Како да го комбинирате ребрестото кадифе со други материјали

Кога станува збор за стилизирање, еден од најдобрите трикови е комбинирањето различни текстури. Кадифето одлично се согласува со мазен памук, волна, кожа и фино плетиво. Така, на пример, ребрестите кадифени панталони можеме да ги носиме со мек џемпер од кашмир или волна, додека кадифеното здолниште ќе изгледа интересно со едноставна кошула и кожна јакна. Сепак, не мора да застанеме на едно парче. Комбинацијата на кадифе со жакард може да изгледа многу впечатливо, но важно е внимателно да се изберат боите и дезените. Ако и двата материјали имаат изразена текстура, остатокот од комбинацијата треба да биде сведен. На тој начин се добива слоевит изглед што делува промислено, а не преоптоварено со детали.

Кадифе во боја за поинтересен есенски стил

Иако кафеавата, црната и тегет се меѓу класичните избори, кадифето е одличен материјал за експериментирање со бои. Бордо панталони, маслинесто здолниште или јакна во коњак нијанса можат да станат централниот дел од комбинацијата, особено кога ќе се спојат со неутрални тонови како крем, беж и сива. За оние што претпочитаат подискретен пристап, темнокафеавото кадифе е добра алтернатива на црните парчиња, а воедно внесува и повеќе топлина во изгледот.

Извор: Lepota i Zdravlje