Нова серија за Селин Дион открива како започна глобалната икона

Животот на една од најголемите музички ѕвезди на сите времиња, Селин Дион, наскоро добива нова телевизиска интерпретација.

Во подготовка е драмска серија насловена „Growing Up Dion”, која ќе се фокусира на нејзиното детство и раните години на растење во канадскиот Квебек – период кој го обликувал еден од најпрепознатливите гласови во светската музика.

Приказната не враќа во скромниот, но жив и динамичен семеен дом каде што музиката не беше само хоби, туку начин на живот. Селин порасна во семејство со дури 13 браќа и сестри, во околина каде гласовите, инструментите и секојдневниот семеен хаос создаваа посебна симфонија на детството. Токму таа енергија, според навестувањата на серијата, ќе биде клучниот елемент кој ќе ја изгради приказната за нејзиното растење.

Уште на 12 години, Селин Дион го потпишува својот прв договор, што го започнува патот кој ќе ја доведе до статусот на глобална музичка икона. Серијата ќе го прикаже токму тој премин – од девојче од големо семејство до млада уметница која многу рано влегува во светот на професионалната музика и големите очекувања.

Посебен фокус ќе биде ставен на односите во рамките на семејството, особено на врската со мајката Терез Дион, како и на комплексната динамика меѓу братчињата и сестрите, кои имаа силно влијание врз нејзиниот карактер, амбиција и емоционална сила.

Продукцијата на проектот ја води нејзиниот брат Жак Дион, додека сценариото е засновано на книгата „Dion, A Family Saga”, која ја потпишува нејзиниот внук Џими Дион. Ова е првпат семејството официјално да е вклучено во некоја драмска екранизација на нејзиниот живот, што му дава на проектот дополнителна доза автентичност.

Селин Дион денес ја сметаат за една од најуспешните и најпродаваните уметници во историјата на музиката, со кариера која трае децении и албуми што ги соборуваа рекордите ширум светот. Нејзиното музичко наследство вклучува многубројни награди и повеќе албуми кои ги надминаа милионските тиражи на глобално ниво.

Во последните години, јавноста ја следи и нејзината борба со синдромот на крутен човек (Stiff-person syndrome), редок невролошки нарушување кое ја оддалечи привремено од сцената. Сепак, последните информации зборуваат за подобрување на нејзината здравствена состојба, со навести за можни нови јавни појавувања, вклучително и во Париз.

И додека серијата се уште се развива, едно прашање веќе предизвикува најголемо внимание кај публиката – кој ќе ја толкува Селин Дион во најраните години, во моментот кога почна да станува она што е денес: глобална музичка легенда.