Пантоне Клауд Денсер: Како да ја носите бојата на 2026 година

Ништо не нè спречува уште сега да ги отвориме вратите за нејзината етерична, лесна, но луксузна естетика.

Во свет кој се менува побрзо отколку што можеме да го следиме, во ера кога естетиката често диктира чувство на рамнотежа, Пантон, како и секоја година, ја претставува нијансата што ќе го обоји расположението и стилот на новата сезона. Но во 2026 година се случи тивка револуција: за првпат по 26 години постоење на овој моден ритуал, бојата на годината не е силна, не е дрска, не е тука за да го одземе целото внимание. Тоа е Cloud Dancer – етерична, пердувесто нежна белина која потсетува на кристално чист воздух. Бело што симболизира ветување.

Како што објасни Леатрис Ајзман, креативниот дух на Пантон институтот за боја, изборот на оваа нијанса претставува свесен повик да се вратиме кон јасноста на погледот и мислата. Во време кога бучавата – и реалната, и симболичната – се таложи околу нас речиси задушувајќи нè, Cloud Dancer доаѓа како светол предах, како момент на оддалечување и олеснување.

Иако официјалната објава допрва се очекува, модните инсајдери очигледно одамна го „чувствувале“ шепотот на новата естетика. Меган Маркл, како да ја слушнала пораката од 2026 пред сите, се појави во октомври во целосно бела креација на Баленсијага, докажувајќи дека белата може да биде целосно доминантна. Наскоро потоа, Гвинет Палтроу избра бела твеед комбинација за гала-настанот Women in Entertainment, зрачејќи со онаа тивка, суптилна елеганција што ја носат најпромислените модни избори.

А додека броиме уште само неколку недели до официјалниот влез во новата година, ништо не нè спречува уште денес да ја прифатиме оваа нова естетика. Cloud Dancer не е боја што бара строги правила – таа е флексибилна, тивко луксузна, ненаметлива, а сепак впечатлива. Нијанса што се вклопува во секојдневието без никаков напор. Бела што ги милува сите текстури: од плетива што греат, до свилени набори што се лизгаат под прстите.

Затоа, додека се надеваме на година што ветува поголема јаснотија, едноставност и емотивно освежување, можеме уште денес да ѝ дадеме место на Cloud Dancer во нашата лична модна палета – како мал, нежен навестувач на нов почеток што допрва доаѓа.

Ако сте во потрага по парчиња облека во оваа невообичаена боја, погледнете ја галеријата со фотографии и пронајдете ги вашите омилени.