МЕРИЛИН МОНРО: ШТО ЈА ДОНЕСЕ ДО НЕЈЗИНАТА МИСТЕРИОЗНА СМРТ ПРЕД 63 ГОДИНИ?

Пред точно 63 години, светот изгуби една од своите најсјајни и најмистериозни фигури – Мерилин Монро, вечната икона на гламурот и женската заводливост.

Таа беше синоним за 20-тиот век: привлечна русокоса убавица, ранлива ѕвезда со насмевка вредна милион долари и тага во погледот.

Мерилин беше пронајдена мртва на 4 август 1962 година во нејзиниот елегантен дом на адресата Фифт Хелена Драјв во Лос Анџелес. Лежеше гола, со лице надолу, со телефонска слушалка во рака, а на ноќната масичка покрај неа стоеше празно шишенце со 50 капсули од силниот седатив Небутал. Имаше само 36 години.

СМРТ ШТО НИКОГАШ НЕ ПРЕСТАНА ДА ПОТТИКНУВА ПРАШАЊА

Иако полицијата брзо ја класифицираше смртта како самоубиство предизвикано од предозирање со барбитурати, теориите на заговор никогаш не стивнаа. Дали беше жртва на сопствените емоции, политички релации или само уште еден скршен бисер на Холивуд?

Зад сјајниот имиџ се криеше Норма Џин Бејкер — девојче со несреќно детство, нестабилна мајка и живот по домови и кај злоупотребувачки старатели. Раните од тој период ја следеа во текот на целиот живот, фрлајќи сенка дури и врз најсјајните моменти од нејзината кариера.

НОВ ПОЧЕТОК ШТО НИКОГАШ НЕ СЕ ОСТВАРИ

Во месеците пред смртта, изгледаше како да се обидува да започне ново поглавје. Купи своја прва куќа во Брентвуд, се сликаше за насловната страница на магазинот Лајф и штотуку беше повторно ангажирана како главна актерка во филмот Something’s Got to Give, од кој претходно беше отпуштена поради чести доцнења на снимањата.

Но во исто време, Мерилин чувствуваше притисок — годините минуваа, а нејзиниот статус како холивудска божица полека бледнееше. Последните нејзини филмови не доживеаја успех, а бракот со третиот сопруг, писателот Артур Милер, заврши една година претходно.

Се шушкаше и за нејзините љубовни афери – најгласно за оние со претседателот Џон Ф. Кенеди и неговиот брат Роберт Кенеди. Само неколку месеци претходно, Мерилин му ја отпеа заводливо „Happy Birthday“ на гала-свеченост, носејќи ја легендарната фустанка на дизајнерот Жан Луј, во која изгледаше како да е целосно гола.

ЦЕНАТА НА СЛАВАТА

„Да се биде секс симбол е тешко бреме, особено кога си уморна, повредена и изгубена,“ признала тогаш. Таа беше жена што му подари на светот гламур, а за возврат доби само површна љубопитност. „Холивуд ќе ти плати 1.000 долари за бакнеж, но само 50 центи за душата,“ рече еднаш.

Зад сцената, Мерилин бараше помош. Во последните денови од животот редовно разговараше со психијатарот д-р Ралф Гринсон. Во кобната сабота, вечерта го повикала во 17:15, велејќи дека не може да заспие. Тој ѝ препорачал прошетка.

Во 20 часот, нејзината домашна помошничка Јунис Мари ја видела како се повлекува во спалната соба. Во 3:25 по полноќ, забележала дека светлото сѐ уште е запалено. Кога не добила никаков одговор, го повикала доктор Гринсон, кој ја отвори вратата – и ја затекна ѕвездата непомична, засекогаш изгубена.

ТАЙНИ ШТО НЕ БЛЕДЕАТ

Поради мистериозните околности на смртта, теориите на заговор се разгореа. Некои тврдат дека Мерилин била убиена бидејќи знаела премногу за претседателот Кенеди, неговиот брат и тајни што никогаш не требале да излезат на виделина. Глумецот Питер Лофорд, зет на претседателот, наводно дошол во нејзиниот дом таа ноќ и ја отстранил компромитирачката порака што ја оставила.

Сепак, официјалната верзија останува иста: токсично предозирање со барбитурати. Во 1982 година, дури две децении по нејзината смрт, обвинителството во Лос Анџелес повторно го отвори случајот. Заклучокот? Нема докази за убиство. Причината поради која трагите од лекот не биле најдени во желудникот беше едноставна – поминало доволно време за супстанците да преминат во крвта и црниот дроб.

ЛЕГЕНДА ЗАСЕКОГАШ

Но ниту официјалните изјави ниту годините не ја намалија опсесијата со светот наречен Мерилин Монро. Нејзината приказна, филмска и реална, продолжува да живее преку филмови како Blonde, модни моменти како појавувањето на Ким Кардашијан на Мет Гала во нејзиниот фустан, и безброј омажи во поп културата.

Мерилин остана вечна енигма – совршен контраст меѓу гламурот и тагата, светлината на рефлекторите и темнината зад нив. Таа беше нежна душа во свет кој не успеа да научи како да ја сака – но ќе ја обожава вечно.