Дали некогаш сте се запрашале како вашиот миленик знае колку е часот, затоа што секој ден во исто време ви го носи поводникот за прошетка?
Како што и самите знаете, кучињата се мошне интелигентни суштества. Тие многу брзо ги учат значењата на извесни облици на нашето однесување, за да можат да предвидат што следува потоа. Ова, во извесна мера, се однесува и на времето.
Иако многу кучиња можат да „кажат“ дека е време за шетање, тие всушност не можат вистински да го разберат концептот на часови и минути.
Но, дали имаат чувство за време?
Апсолутно да! Кучињата дефинитивно имаат чувство дека времето поминува. Тие го восприемаат текот на денот во однос на други работи, како положбата на сонцето на небото, чувството на глад и жед, како и појавата на месечината. Со други зборови, кучињата реагираат на внатрешните ритми во нивниот организам, исто како и луѓето.
Дополнително, на нив влијаат и надворешни фактори како изложеноста на светлина и темнина во текот на денот. Сопствениците обично ги хранат своите миленици во исто време секој ден, ги шетаат и прават време за игра. Затоа, не се работи толку за тоа што кучето знае дека е 21 часот, туку што сигналите од околината му покажуваат што треба да следи.
Како кучињата знаат кога е време за будење, шетање, вечера?
Кучињата не го поврзуваат нужно дневното светло со поимот утро, или темнината со ноќта. Наместо тоа, нивното чувство за време е зајакнато преку вашата рутина и однесување. Додека дневното светло може да значи дека е утро, за кучето тоа истовремено претставува време за појадок, кафе и подготвување за работа.
За нив тоа не е ништо различно – ве набљудуваат и брзо учат што следува. Кога ќе се вратите дома, кучињата повторно препознаваат шаблон: хранење, шетање, игра. Не им треба многу да го разберат редоследот на настаните.
Биолошките потреби му помагаат на кучето да стекне поим за време
Дали стомакот на вашето куче гласно се огласува од глад? Секако! Во таков момент, со сигурност знае дека е време за вечера. Истото важи и за потребата за извршување нужда.
Меѓутоа, стручњаците истакнуваат дека овие биолошки функции се движени повеќе од личните потреби и навиките, отколку од самиот часовник. На пример, ако сте навикнале да го храните вашето куче наутро и навечер, неговото тело ќе се прилагоди на тој распоред. Иако ќе прифати закуска во кое било време, никогаш нема да пропушти да ве почека крај својата чинија кога доаѓа време за вечера.
