Паралелно со Нацрт-заклучоците за Советот на ЕУ, француското претседателство до амбасадорите на земјите членки, денеска ја достави и Предлог-преговарачката рамка, во која како критериуми се вметнати повеќе бугарски барања.
Во акцискиот план кој треба да го спроведе Македонија, освен заштитата на малцинствата и недискриминацијата, се споменува и образованието.
Во точката 5 од преговарачката рамка посветена на Копенхашките критериуми, се споменува и постигнувањето опипливи резултати и спроведување во добар дух на двата билатерални договори со соседите – Преспанскиот со Грција и оној за добрососедство со Бугарија, а во овој контекст се наведени и протоколи за спроведување на договорот со Бугарија, со назнака дека нивното полно име ќе биде дополнително одредено, што наведува на заклучок дека до 23 јуни Софија и Скопје ќе треба да потпишат таков документ, односно Протокол за спроведување на договорот за четирите барања од Бугарија.
Во Предлог-преговарачката рамка, како дел од поглавјата 23 и 24, Македонија ќе треба да усвои акциски план посветен на заштита на правата на малцинствата и заедниците, чие исполнување редовно ќе се следи на Меѓувладините конференции. „вклучително и во делот на не-дискриминацијата, борбата против говорот на омраза, образованието, обезбедувањето ефективни мерки, механизми за пријавување и идентификување на одговорни институции за тоа. – стои во точката 35″
Во самата преговарачка рамка, во точката 4 каде се наведуваат обврските на Македонија да ги почитува вредностите на ЕУ, освен „традиционалните“ барања за напредок во владеењето на правото, борбата против корупцијата и основните права, француското претседателство ги додава и „анти-дискриминацијата и борбата против говорот на омраза“.
