Поранешен вработен во приватна скопска фирма лоцирана во населбата Кисела Вода, му го запалил џипот марка BMW на бившиот негов работодавец и газда на фирмата поради неисплатени плати, а самиот газда го полил со бензин, но не го запалил.
Џипот бил паркиран на паркингот на фирмата, па вработените веднаш притрчале и го изгаснале опожарениот автомобил, чија предна лева страна била во пламен. Газдата останал полеан со бензин, а поранешниот вработен не посегнал да го запали и него откако другите вработени се симнале на паркингот да го гаснат пожарот, пренесува Макфакс.
Случајот во полиција го пријавил газдата. Во пријавата навел дека поранешниот вработен бил револтиран оти не му биле исплатени неколку плати.
„На 3.9.2019 во 13.43 часот во СВР Скопје, И.И. (51) од Скопје, сопственик на фирма на булеварот Србија, пријавил дека поранешен вработен во фирмата, Љ.С. (56) од Скопје, со бензин го полеал неговото патничко возило ‘бмв икс 6’, кое било паркирано на паркингот на фирмата и го запалил. Причина за тоа, според пријавеното, се неколку неисплатени плати кон Љ.С.. Огнот го изгаснале вработените, а Љ.С. бил приведен во полициска станица за расчистување на случајот“, извести МВР.
Поранешниот вработен, кога го запалил џипот и го полеал со бензин и газдата, воопшто не се обидел да побегне, туку мирно чекал да дојде полиција.
*Фотографијата погоре е преземена илустрација, не е автентична од местото на случувањето
