Кривична пријава за малолетникот кој го подметнал пожарот кај Матка

Полицијата соопшти дека малолетник од Скопје е осомничен дека го подметнал пожарот кај Матка и против него ќе биде поднесена пријава.

Како што се наведува во соопштението на МВР, на 3 август околу 13:46 часот, во Единицата за известување и команда во СВР Скопје телефонски е пријавено дека во село Долна Матка во близина на кајак клубот, односно шумата спроти реката Треска, е зафатена од пожар којшто се ширел со голема брзина.

Веднаш по пријавата за настанот на лице место излезени се полициски службеници од ПО Сарај, вработени од ЈП Паркови Зеленило, БППЗ Скопје и ЦУК, a известен e и Јавен обвинител.

„По превземените оперативни мерки и активности дојдено до сознание дека можен сторител на кривичното дело е Л.Ш. (17) од Скопје за што од страна на СВР Скопје, по комплетирање на целосната документација, противе него ќе биде поднесена кривична пријава по член 227 од КЗ на РМ“, се наведува во соопштението.