Кога ќе одлучите да започнете со здрава исхрана, без разлика дали сакате да слабеете или да зголемите мускулна маса, можеби ќе слушнете разни стереотипни правила и совети.
Советите за исхрана се различни, бидејќи секое тело функционира поинаку и има различни потреби. Подолу наведуваме 6 од најлошите совети за исхрана кои можеби сте ги слушнале.
МАСТИТЕ ДЕБЕЛЕАТ И ЈА РЕМЕТАТ ВАШАТА ИСХРАНА
Генерализација што дефинитивно заслужува место меѓу најлошите совети за исхрана. Зависи од видот на мастите што ги консумирате. Ако пречесто јадете високо преработена храна, на пример, нејзините масти може да го зголемат нивото на холестерол. Но, постојат и здрави масти кои се неопходни за правилно функционирање на срцето и имуниот систем, како што се авокадото, оревите и лососот.
ИЗБЕГНУВАЈТЕ ЈАГЛЕХИДРАТИ
Дали прекумерната консумација на бел леб и ориз може да биде одговорна за дебелеење? Нема истражувања што докажуваат дека интегралните житарки, овошјето, зеленчукот и мешунките негативно влијаат на здравјето или тежината. Напротив, исхраната што ги вклучува овие намирници има позитивен ефект врз целото тело.
ИЗБЕГНУВАЈТЕ ГРИЦКИ
Јадењето мали количини грицки е одличен начин да избегнете чувство на глад, да ја контролирате големината на порциите и да правите подобар избор на храна. Грицките што се корисни за здравјето и ќе ви дадат енергија во текот на денот се ореви, овошје, житарки или јогурт.
ГОРИТЕ ПОВЕЌЕ КАЛОРИИ КОГА ВЕЖБАТЕ НА ПРАЗЕН СТОМАК
Ако не јадете пред да започнете со вежбање, тоа нема да придонесе за согорување на повеќе калории, но ќе доведе до губење на мускулна маса. И пред да помислите дека можете да земете енергетски пијалак, ве информираме дека тоа може да биде штетно ако го консумирате на празен стомак.
ПАЗЕТЕ НА ИСХРАНАТА ВО ТЕКОТ НА НЕДЕЛАТА, А ВИКЕНДОТ ОДМОРЕТЕ
Оваа навика би можела да го уништи вашиот петдневен напор. Ако одеднаш консумирате “тешка” храна со многу калории и големо количество алкохол, ќе ја вратите телесната тежина што можеби сте ја изгубиле претходните денови. Се разбира, викендите можете да се почестите со нешто што сте го избегнувале во текот на неделата, но умерено. На пример, испијте чаша вино или коктел, но не повеќе.
ОВОШЈЕТО ДЕБЕЛЕЕ
Шеќерот во овошјето не доведува до зголемување на телесната тежина, бидејќи е природен и непреработен. Не би било правилно да избегнувате овошје само поради шеќерот што го содржи, бидејќи истото има влакна кои го одржуваат чувството на ситост. Во овошјето се содржат и важни хранливи материи, што е многу поважно од загриженоста околу природниот шеќер што го внесувате со јадење на, на пример, јаболко, банана или грозје.
