Уствари викендов е затишје пред бура! ↓↓↓
Водејќи се од државните и национални интереси, највисоките стратешки цели за членство во ЕУ како и интересите на сите граѓани, Централниот одбор на СДСМ на вчера одржаната седница едногласно донесе Одлука со која го поддржа процесот за отпочнување преговори со ЕУ. Оваа информација доцна вечерва ја соопштија од владејачката СДСМ преку писмено соопштение испратено до медиумите.
-Со оваа одлука, Централниот одбор на СДСМ го поддржува процесот за отпочнување на преговорите за полноправно членство во ЕУ согласно Предлог – преговарачката рамка за пристапни преговори со Унијата од последниот европски предлог од 30 Јуни 2022 година, предложен од претседателството на Франција.
СДСМ како државотворна партија останува цврсто кон определбата за безусловно почитување на јазичните, идентитетските, историските и културните особености на Македонскиот народ, како елементи за кои не се преговара со ЕУ во ниту едни околности.
Овие определби и принципи СДСМ очекува да бидат поддржани од сите политички субјекти во Собранието преку носење на натамошни заклучоци за европскиот предлог, согласно собраниските процедури.
Во преговарачкиот процес, Владата, заедно со сите институции, и понатаму треба доследно да се придржуваат до Резолуцијата за македонските црвени линии усвоена од македонското Собрание.
Нашата земја е пред многу важна одлука за нејзината иднина и остварување на уште една стратешка цел, отворање на преговорите со Европската унија со зачуван и обезбеден македонски јазик во ЕУ. Toa значи конечно затворање на сите идентитетски прашања“, стои во нивното соопштение.
Имаме предлог кој гарантира чист македонски јазик во ЕУ, историски и билатерални прашања надвор од преговарачката рамка.
Сите политички партии треба да пристапат одговорно, државнички и рационално и заедно да ја донесеме долгоочекуваната државна одлука за продолжување на евроинтегративниот пат на земјата“, се додава во нивното соопштение.
