Стилски пешкир за плажа: Како да одберете шик модел за летово

Го купивте совршениот костим за капење, стајлиш шапка, тренди сандали и очила за сонце што кријат и поглед и подочњаци, ама… што е со пешкирот?

Ако сè уште го бирате „набрзина“, време е за модна надградба.

Зашто плажниот пешкир не е само практична работа за сушење – тоа е платно на вашата летна модна приказна. Местото каде што лежите, сликате сториња, читате книга и ја впивате сончевата светлина. Првиот детаљ што некој ќе го забележи кога ќе се сместите на плажа – и последниот што останува во кадарот. Со други зборови? Вашиот пешкир зборува – и кога вие молчите.

1. Вашиот пешкир – модна грешка од ланското лето?

Ако е избледен, тенок како хартија и уште носи лого од некоја промоција од 2013, можеби е време за нов. Пешкирот треба да се вклопи во вашиот стил, а не да ви го уништи Инстаграм моментот. Ако не изгледа како продолжение на вашиот моден израз – не е вистинскиот избор.

2. На допир – поважно отколку што мислите

Не, не се сите пешкири исти. Некои ќе ве мазат како плишано мече, а други ќе ви се чинат како да триете со шмиргла. Еве неколку фаворити:

• Пешкир од велур – мазен, луксузен, идеален за релаксирање.
• Турски пешкир (пештемал) – ултра лесен и брзо се суши, идеален за минималистки кои патуваат лесно и со стил.
• Жакард ткаенина – за љубителки на текстура и префинети шари.

Изберете материјал што ќе ви годи на кожа – по сонце, се’ треба да биде како нежен допир.

3. Дизајнот е вашата лична порака

Вашиот пешкир е мала модна изјава.

• Еднобоен – чист, едноставен, елегантен.
• Рајстапан – летен класик со шмек од француската ривиера.
• Апстрактни или геометриски дезени – за љубителки на уметност и минимализам.
• Бохо цветни – може, но внимавајте да не заличи на туристички кич.

А ве молиме – скокнете ги тие со натписи како „Beach Hair, Don’t Care“. Тоа веќе беше и замина.

4. Големината е важна. Сериозно.

Големиот пешкир е новата кралица на плажата – практичен, впечатлив и совршен за фотосесија.

Може да го обвиткате како саронг, да го искористите како прекривка за пикник или да го поврзете со костимот, торбата или кимоното за целосен effortless chic впечаток.

Вистинскиот пешкир не е луксуз. Тој е став со стил.

Не морате да го менувате секоја година – само внимателно избирајте. Како и сè вредно во животот – со вкус, со мерак и со почит кон себе. Зашто летната елеганција? Таа не се гледа само во фустанот – туку и во пешкирот што нежен се шири по жешкиот песок.