Што претставува coffee nap и како кафето пред спиење може да ви помогне подобро да се одморите?
Секоја од нас одвреме-навреме чувствува силна потреба за сон среде ден. Главната причина обично е недостиг на ноќен сон, но и луѓе кои имаат беспрекорна рутина на спиење понекогаш се соочуваат со ова.
Секако, не секој има можност да дремне во текот на работниот ден, но доколку можете да издвоите 20–30 минути за краток попладневен сон, дефинитивно не треба да се откажете од таа шанса. А за тој краток сон да биде уште поефикасен и за да се разбудите со поголемо ниво на енергија, постои еден необичен трик – испијте кафе пред спиење.
Да, идејата на прв поглед изгледа нелогична. Кофеинот е моќен стимуланс и нè одржува будни, па може да ви изгледа како кафето пред спиење наместо да ви помогне, само да ви го расипе сонот. Но, науката вели сосема спротивно – ефектот на „coffee nap“, како што се нарекува оваа уникатна техника на одмор, е потврден низ бројни клинички истражувања.
Како функционира?
Кафето мора да помине низ дигестивниот систем за да влезе во крвотокот, а тоа трае околу 20 до 30 минути. И токму овој временски прозорец е идеален за краток сон кој го зголемува ефектот на кофеинот. Во текот на сонот, нивото на аденозин – невротрансмитер одговорен за чувството на замор – се намалува. Со тоа, кофеинот има „почист пат“ да делува кога ќе се разбудите и резултатот е дека се чувствувате посвежо, поконцентрирано и подготвени за нови задачи.
Што треба да знаете пред да пробате coffee nap
За coffee nap да има вистински ефект, треба да се почитуваат неколку основни правила. Идеално, кафето треба да биде црно – еспресо или филтер кафе. Ако не можете без додатоци, ограничете се само на малку млеко или павлака, но избегнувајте шеќер. Веднаш штом ќе го испиете кафето, поставете аларм и легнете да дремнете. Времето на спиење никако не смее да надмине 30 минути. Ако спиете подолго, лесно можете да навлезете во подлабока фаза на сон, поради што ќе се разбудите уморни и раздразливи, наместо полни со енергија.
