Терапевтката Вирџинија Сатир еднаш рече: „Ни требаат четири прегратки дневно за да преживееме, осум за да останеме исти и дванаесет за да напредуваме.“
Во светот на модата и луксузот, постои нешто подрагоцено и помоќно од совршениот моден додаток – емоционалната топлина.
ПРЕГРАТКАТА – ЛУКСУЗ КОЈ НИКОГАШ НЕ ИЗЛЕГУВА ОД МОДА
По сјајот на празничната сезона, враќањето во секојдневието може да изгледа малку сиво и монотоно. Затоа прегратката е како богат, кашмирски капут – загрева, нуди утеха и додава доза на софистицираност во емоционалниот пејзаж.
Познатата порака на семејната терапевтка Вирџинија Сатир нагласува колку прегратките се неопходни за нашата добросостојба. Тие не се само гест на наклонетост, туку и суштински дел од емоционалната рамнотежа. Но, не е важен само бројот – истражувањата покажуваат дека и времетраењето на прегратката игра клучна улога.
20 СЕКУНДИ ДО ЕМОЦИОНАЛНА ХАРМОНИЈА
Науката го потврди она што го чувствуваме интуитивно – прегратката може да го намали стресот и да го подобри расположението. Во едно истражување, учесниците се соочија со стресен предизвик: јавен настап. Половина од нив, пред говорот, добија прегратка од сакана личност, додека другите не добија ваква поддршка. Резултатите беа изненадувачки – оние кои добија прегратка од 20 секунди имаа значително понизок ниво на стрес.
Затоа, само 20 секунди од овој нежен луксуз можат да направат да се чувствувате посмирени, посигурни и емоционално посилни. Замислете го тоа како најфина свилена марама која ве обвива и ве штити од секојдневните грижи.
АЛТЕРНАТИВА ЗА ОНИЕ КОИ НЕ СЕ ЉУБИТЕЛИ НА ФИЗИЧКИ КОНТАКТ
За оние кои немаат потреба од прегратки или не се склони кон физичко изразување на емоциите, постои стилска алтернатива – прегратка од перница. Јапонско истражување покажа дека дури и кога испитаниците зборуваа преку телефон за стресни теми, оние кои држеа специјално дизајнирана перница во форма на личност (наречена Hugvie) имаа значително понизоко ниво на кортизол – хормонот на стрес.
Изгледа дека самата положба на прегратка – раширени раце и благ притисок – носи чувство на сигурност и смиреност, дури и ако прегратката е симболична.
МАЛ РИТУАЛ СО ГОЛЕМ ЕФЕКТ
Во свет каде постојано бркаме нови трендови и стилови, понекогаш наједноставниот гест е оној кој најмногу нè збогатува. Затоа, без разлика дали сте во прегратка на саканата личност, најдобриот пријател, елегантен волнен капут или мека перница – дозволете си да уживате во овој нежен луксуз. Бидејќи, на крајот на денот, она што го носиме во срцето е поважно од она што го носиме на себе.
Прегрнете некого денес и ослободете се од стресот со стил.
