Поплави во Тетово, Виница, Пелагонија и други места низ Македонија предизвикани од силните дождови – во с.Лажани поплавени 50 куќи

Синоќешните обилни дождови и невреме кои ја зафатија Македонија предизвика поплави во Прилеп, Битола, Виница, Неготино, Тетово… Во прилепското село Лажани вчера вечер биле поплавени 50 куќи, а дел од населението било евакуирано по обилните дождови.

Градоначалникот на општина Долнени, на која и припаѓа селото Лажани, Урим Ибески изјави дека нема повредени, но има евакуирани жители. „Причина е излевањето на реката, која поради невремето, како и несовесното градење и отпадот, поплави голем број куќи“, рече Ибески.

Покрај Лажани во општина Долнени, поплавени биле уште неколку села, а Центарот за управување со кризи (ЦУК) соопшти дека водата во околината почнала да се повлекува. Во Долнени струјата била превентивно исклучена за заштита на луѓето и мрежата. Има поплавени куќи и во Кривогаштани.

Во Неготино се регистрирани оштетени кровови и поплавени домови. Силен дожд врнеше и во Битола и Крушево. Поради паднато дрво вчера неколку часа во прекин беше и сообраќајот во двата правци на патот Битола – ГП Меџитлија.

Невремето во Виница поплави 30 до 40 објекти. Во Виница наврна најмногу дожд на метар квадратен – 55 литри.

И во Тетово по обилните синоќешни врнежи од дожд има има поплавени подруми, гаражи и куќи, а се излеа и канализација од неколку шахти.