Нега на лицето за време на бременост: што смеете, а што никако не треба да правите

Нега на кожата за време на бременост: Што смеете, а што никако не треба да правите

Бременоста е едно од најубавите, но и најделикатните животни поглавја – период исполнет со големи промени, и во телото и на кожата.

Додека телото се подготвува за својата нова улога, кожата исто така поминува низ вистинска револуција: може да стане посува, почувствителна, да се појават дамки или акни. Затоа рутината за нега во овој период е поважна од кога било – не само од естетски, туку и од здравствени причини. Клучот е во пронаоѓањето на вистинскиот баланс меѓу природно и ефикасно, нежно и заштитно.

На што треба да внимавате

За време на бременоста, одредени активни состојки во козметиката можат да бидат премногу агресивни или дури ризични. Затоа избегнувајте ретиноиди и високи концентрации на салицилна киселина. Наместо нив, изберете побезбедни природни алтернативи, како бакучиол – растителен еквивалент на ретинолот, кој делува слично, но е целосно безбеден. Истото важи и за хемиските пилинзи и силните ексфолијанти – преферирајте благи механички пилинзи или едноставни пилинзирачки производи кои нема да ја иритираат кожата.

Фокусирајте се на хидратација

Вашиот најверен сојузник за време на бременоста е – длабинската хидратација. Креми, серуми и масла богати со антиоксиданти ја смируваат кожата, и ѝ ја враќаат еластичноста и сјајот. Идеални состојки се хијалуронска киселина, керамиди и пептиди – кои помагаат кожата да ја задржи природната влага и го намалуваат чувството на затегнатост и сувост.

Не ја заборавајте заштитата од сонце

Кожата на трудниците е особено чувствителна на УВ зраци, поради што пигментни дамки и промени во бојата стануваат почести. Затоа заштитата со СПФ мора да биде дел од вашето секојдневие – дури и кога е облачно.

Благото чистење е на прво место

Избирајте благи средства за чистење кои нема да го нарушат природниот заштитен слој на кожата. Целта не е „шкрипливо“ чисто лице, туку здрава и урамнотежена кожа.

Бременоста е совршена можност да забавите, да го слушате своето тело и да му дадете помирна и посвесна нега. Бидејќи додека се грижите за себе, ја создавате најубавата светлина – онаа што доаѓа однатре.