Не бил само синот од Талат – во тој период масовно предвреме се полагал правосуден испит


Викенд најава: Интер - Милан, Тотенхем - Ман.Сити и Феенорд - ПСВ ↓↓↓



Првиот човек на Државната комисија за спречување на корупцијата (ДКСК), Билјана Ивановска, синоќа истакна дека предвременото полагање правосуден испит било масовна појава во тоа време, кога и синот на Талат Џафери, Барлет Џафери положил правосуден испит пред да дипломира.

Ивановска за ТВ Телма,рече дека погрешно се толкува во јавноста дека ДКСК не отвора предмет за случајот со Барлет Џафери. Таа вели „не дека не сакаме, туку до тука можеме да истражуваме“.

„Начнавме еден случај, но за жал мислам тоа било масовна појава во тоа време. Привлече за уши дека е син на познат функционер, но веднаш после тој предмет јас кажав за уште еден таков случај, но не допре до јавноста бидејќи не е познат“, рече Ивановска.

Тоа што падна во очи, вели таа, е тоа што воочиле дека во февруари 2015 година Џафери го положил правосудниот испит, а во јули истата година се стекнал со 300 кредити, односно завршил магистерски студии.

Претседателката на ДКСК посочи дека не можеле да откријат кој е тој што му дозволил на Барлет Џафери да полага предвреме.

„И тоа е нашиот проблем, затоа за нас постапката застанува тука“, рече Ивановска, додавајќи дека податоци побарале од сите институции и оти таргет за нив се службените лица.

Од тогаш, како што рече, поминати се седум години и делото е застарено. Меѓутоа, додаде, за да покренат каква било иницијатива треба да имаат документ, бидејќи со претпоставка не можат.

„Ние го извадивме случајот на виделина. Во тоа време ова било појава. До мене стигнуваат информации дека многу лица се пријавувале да полагаат предвреме правосуден испит, како да имало сива зона во тој период“, нагласи Ивановска.

Затоа, како што заклучи, нивната препорака што произлезе од последната седница, е Министерството за правда на веб-страницата да си отворат место со документи на сите кои се пријавиле како кандидати за правосуден испит и да не се ништат, а од инспекторите побарале да утврдат дали се применуваат законските одредби или повторно се прават злоуптореби.

„Ние треба да имаме систем отпорен на непотизам и корупција кој сам ќе ги отфрла. Може тие деца вредат, но може не вредат, а земаат место на тие шти вредат“, рече Ивановска.