Минимализам со став: Елеците го освојуваат летниот уличен стил

Минимализам со карактер: прслукот ја освојува летната улична мода

Некои модни парчиња едноставно никогаш не излегуваат од мода – постојано се враќаат, се трансформираат и добиваат нов, модерен дух. Таков е и случајот со прслукот – некогаш резервиран за машка гардероба, денес незаменлив моден сојузник на секоја девојка што знае што сака.

Ова лето, прслукот добива главна улога во гардеробата. Веќе не е само дел од деловните костими или канцелариски изгледи. Сега може да се носи како самостоен топ, или во комбинација со широки ленени панталони, тесни модели по тело, омилени фармерки со широки ногавици, па дури и со мини шорцеви. Пораката е јасна: минимализам со став, удобност проследена со суптилна софистицираност – тоа е новиот „тих израз“ на ова лето.

Големите модни куќи како Сен Лоран, Прада и Д Роу го зададоа темпото – прслукот се појавува во секоја пригода, од класични, остро скроени модели со изразени копчиња, до лежерни плетени изданија што внесуваат лесна боемска нота во стајлингот. Клучот за успех е едноставен: помалку е повеќе – со акцент на материјалот, кројот и квалитетот.

На улиците, прслукот е вистински моден хит. Модните инсајдерки го носат директно на кожа за ретро „деведесетарски“ вибрации, или пак, го комбинираат слоевито преку маици и кошули. Хејли Бибер го облекува со елегантни панталони за совршен утрински изглед, додека Кендал Џенер го носи со бермуди и мокасинки, внесувајќи нова класична енергија во лежерниот стил.

Најдобриот дел? Прслукот е неверојатно разновиден! Може да биде и топ и дополнителен слој над други парчиња – сè зависи од расположението и пригодата. За вечна елеганција, изберете неутрални нијанси како црна, бела, беж или сива. А за оние што сакаат да експериментираат – одлучете се за силни бои што освежуваат и го подигнуваат секој изглед.

Летото 2025 има свој моден јунак – и тоа е токму прслукот. Ако сè уште немате еден во плакарот, сега е совршено време да му дадете шанса. Зашто вистинскиот стил често се крие во едноставни, но одлично искористени модни парчиња.