Валунзи, потење, несоница, нервоза и сите тие „убавини“ што ги носи менопаузата…
Да, свесни сме – не сте го избрале тоа, но добрата вест е дека постојат начини да ги ублажите симптомите и повторно да се чувствувате добро во сопствената кожа. И запомнете – и ова ќе помине!
Ако сте забележале дека одеднаш ве фаќа жештина, дека ноќе скокате од кревет цели во пот, и дека шминката не ви трае ни половина час – добредојдовте во светот на перименопаузата и менопаузата. Тоа е нормално животно поглавје за секоја жена, но не значи дека морате беспомошно да го издржувате.
Покрај валунзите и потењето, многу жени забележуваат промени на кожата, косата, па дури и во расположението – фризурата не се одржува, лицето се мрси или суши, а огледалото станува брутално искрено. Покрај сѐ, доаѓа и она фрустрирачко заборавање на секојдневни поими.
Што можете да направите? Првото и најважно – без паника. Постојат начини да си помогнете.
Мала школа за самозаштита во менопаузата
Храната како лек: Избалансирана исхрана богата со протеини, растителни влакна, витамини и антиоксиданси може да направи чуда за вашиот организам. Внесувајте доволно калциум, магнезиум и витамин Д3 за здрави коски, а Б12 за подобра меморија. Избегнувајте премногу кафе, шеќер, алкохол и лута храна – тие го поттикнуваат појавувањето на валунзи! Шише со ладна вода нека биде секогаш покрај вас.
Лесна гардероба: Заборавете на синтетика. Природни материјали како памук или лен, облекување во слоеви и проветриви ткаенини се ваши нови сојузници. Истото важи и за постелнината – ладни и пријатни материјали ќе ви го олеснат справувањето со ноќните валунзи.
Сон во свежа просторија: Спијте во разладена и добро проветрена просторија – квалитетен сон е половина здравје.
Кажете збогум на цигарите: Пушењето ги влошува симптомите на менопаузата – време е засекогаш да се збогувате со тутунот.
Движењето како терапија: Без разлика дали е тоа пилатес, пливање, јога или танц со пријателки – физичката активност помага да се чувствувате подобро, полесно да се справите со стресот и да го подобрите расположението.
Помалку стрес, повеќе уживање: Вклучете мали секојдневни рутини кои ве смируваат – прошетки во природа, домашни миленици, кафе со другарки, омилен хоби или медитација.
Природни сојузници од растенијата
Масло од ноќурка: Богато со фитоестрогени, помага при валунзи, ноќно потење и смена во расположението.
Билката црна кохош: Природно ги балансира хормоните, ги ублажува грчевите, мигрените и хормонските осцилации.
Корен од анѓелика: Ја зголемува продукцијата на серотонин, помага против валунзи и го подобрува расположението.
Ѓумбир и женшен: Го штитат срцето, ја подобруваат концентрацијата и го намалуваат чувството на замор.
Кантарион: Древен сојузник против валунзи, депресија, анксиозност и промени во телесната тежина. Но, внимавајте – може да влијае на дејството на други лекови, консултирајте се со лекар.
Црвена детелина: Извор на изофлавони кои го ублажуваат термалниот стрес, ги зацврстуваат коските и го подобруваат изгледот на кожата и косата.
Напомена: Билните препарати се одлични, но тешко е точно да се одреди дозата и времетраењето на употреба – затоа внимавајте, и секогаш користете ги со стручна консултација.
Медицински опции
Антидепресиви: Колку и да звучи неочекувано, покажале одлични резултати кај валунзи и ноќно потење.
Клонидин: Антихипертензив кој ја намалува фреквенцијата и интензитетот на валунзите, не содржи хормони, но може да предизвика сушење на устата и запек.
Биоидентични хормони: Персонализирани хормонски препарати прилагодени на вашиот хормонски профил, кои се подготвуваат во специјализирани аптеки, но бараат постојан надзор од страна на стручно лице.
Хормонска терапија: Класична замена на хормони (естроген, прогестерон, понекогаш тестостерон), достапна во различни форми: таблети, фластери, гелови, вагинални препарати или спирали. Одлуката за тоа се носи исклучиво во консултација со вашиот гинеколог.
Менопаузата не е крај на вашата виталност – напротив, со мал труд и вистински информации, можете повторно да заблескате и да ја вратите контролата врз телото и расположението. Наоружајте се со трпение, слушајте ги потребите на телото и пронајдете го комбинацијата што најмногу ви одговара. Повторно ќе бидете таа вистинската – можеби дури и подобра!
