Кејти Захарија потврди дека не го положила правосудниот испит иако се претставувала како правник

Нови детали за професионалното минато на Кејти Захарија излегуваат на виделина откако таа дебитираше како најновата портпаролка на Белата куќа во администрацијата на Трамп.

Кејти се претставувала како правник, но новите записи покажуваат дека никогаш не го положила правосудниот испит и нема дозвола да практикува право во Соединетите Американски Држави.

Сега, Кејти ја потврди оваа информација и објасни зошто по неуспехот не се обидела повторно да го положи испитот.

Кејти дипломирала на Правниот факултет при Универзитетот Пепердајн во 2011 година и истата година го полагала правосудниот испит, но не успеала да го положи.

„Резултатите од правосудниот испит беа без особено значење, бидејќи веќе се селев во странска држава каде што тоа не ми беше потребно“, изјавила Захарија за USA Today.

Кејти веќе знаела дека се сели во Кина кога го полагала испитот и вели дека не било важно дали ќе положи, затоа што тој не ѝ бил неопходен за работа во кинеска адвокатска канцеларија.

„Откако се преселив во Кина, навистина не размислував многу за резултатите од испитот, ниту сметав дека тоа е нешто на што треба да се фокусирам“, рекла таа. „Во Кина нема таков правосуден испит. Имав доволно квалификации, односно диплома по право, за да можам да се занимавам со таа пракса.“

Доналд Трамп ја нарекол Кејти „адвокат“ кога ја назначил за портпаролка на Белата куќа, но тоа не е сосема точен опис. Таа за USA Today изјавила дека други правници ѝ рекле оти е прифатливо да се идентификува како правник поради дипломата по право, но не и како адвокат, ниту да ја користи титулата „esquire“.

Сепак, не сите се согласуваат со тоа. Неколку професори за весникот изјавиле дека е „неетички“ и „несоодветно“ некој да се претставува како правник ако нема лиценца за практикување.

Извор: Just Jared