ЈАПОНИЈА ОТИДЕ ЕДЕН ЧЕКОР ПОНАТАМУ: НАЈМУВАШ МАЖ ДА ПЛАЧЕ СО ТЕБЕ

Твоите солзи повеќе не се сами – „Згодните момци што плачат“ се тука!

Ако постои земја што со право може да ја носи титулата „најкреативна кога станува збор за работни идеи и иновации“, тоа без сомнение е Јапонија. Од културата и начинот на размислување, преку козметички трикови и технологија, до невообичаени пристапи кон работата и секојдневието – Јапонците секогаш имаат некоја идеја што ќе не изненади, инспирира и ќе не натера да се запрашаме: „Зошто немаме вакво нешто и ние?“

Во земјата на изгрејсонцето, голем акцент се става на вистинските потреби на луѓето, емпатијата и менталното здравје. Токму поради тоа, настана една професија за која сите зборуваат: мажи кои се платени да бидат со вас додека плачете. Да, точно прочитавте – во Јапонија можете да најмите „Згодни момци што плачат“, на јапонски наречени Икемесо Данши, кои ќе ви дадат емоционална поддршка, ќе ви ги избришат солзите и ќе гледаат тажни филмови заедно со вас.

Веќе слушнавме за невообичаени услуги што ги нуди Јапонија – од изнајмување професионалец што ќе даде отказ во ваше име, со што се избегнува непријатноста и стресот, до тоа дека спиењето на работа се смета за знак на посветеност. Но Икемесо Данши одат еден чекор понатаму: овде плачењето не само што е дозволено, туку и препорачано како терапевтско. Мажите што ја работат оваа работа нудат дискретна и тивка поддршка, дозволувајќи ви целосно емоционално ослободување. А ако сакате, ќе гледате и тажни филмови заедно – затоа што, признаваме, нема посилно олеснување од плачење пред голем екран додека некој нежно ви ги брише солзите.

Стручњаците одамна нагласуваат дека плачењето има терапевтска моќ – го намалува стресот, ги балансира емоциите и помага во ослободување од болните мисли. И токму ова Јапонија го разбира подобро од повеќето – покажува дека изразувањето на чувства не е слабост, туку знак на сила, истрајност и храброст.

Во свет кој сè повеќе ги игнорира внатрешните потреби и брза низ секојдневниот стрес и обврски, вакви иновации нè потсетуваат дека грижата за сопственото психичко здравје е луксуз што сите го заслужуваме. А во Јапонија, благодарение на Икемесо Данши, добивате сигурна поддршка токму тогаш кога ви е најпотребна.

Ако некогаш се најдете во Токио и почувствувате потреба емоционално да се „испразните“, знајте дека постои некој што ќе ве слуша, ќе ги гледа вашите солзи и ќе биде тука за вас – без прашања и без осуда. И да бидеме искрени, тоа можеби звучи необично, но истовремено… е и прекрасно.