„Исток-запад“ е омилената чанта што лесно се пренесува од дневен во вечерен стајлинг

Секоја сезона се издвојува чанта што одеднаш сакаме да ја видиме во нашиот гардеробер, но оваа година еден модел особено привлекува внимание. За популарноста на „исток-запад“ чантата голем дел од заслугите има култната Fendi Baguette, која со новите дезени и современи изданија повторно го освои уличниот стил. Сепак, изгледа дека во оваа силуета има нешто повеќе од носталгија за култниот модел. Нејзините нови, издолжени димензии носат поинаква динамика на стајлингот, но и сосема ново чувство при носење на чантата, доволно елегантни за да изгледаат софистицирано, а истовремено доволно опуштени за да ги замислиме со секојдневни комбинации.

„Исток-запад“ чантите го освојуваат уличниот стил, а знаеме и зошто

Самото име „исток-запад“ чанта звучи малку необично за моден аксесоар, но всушност многу добро ја опишува нејзината форма. За разлика од класичните чанти кои имаат изразена вертикална силуета, овие модели се издолжени хоризонтално, односно се протегаат од една страна на друга како линија што ги поврзува истокот и западот. Токму таа необична пропорција им дава препознатлив изглед и ги прави интересен додаток кој го менува начинот на кој чантата изгледа на телото.

Иако сега се на листата на желби на многумина, „исток-запад“ чантите својот подем го градеа веќе неколку сезони, тивко наметнувајќи се како еден од омилените модели на уличната мода. Посебно внимание привлекоа издолжените силуети како Le Click и Teckel моделите на куќата Alaïa и Barrel чантата на брендот Coach, а на оваа модна приказна се придружи и Jil Sander со своите интерпретации на карактеристичната хоризонтална форма. Од луксузни куќи до подостапни брендови, малкумина останаа имуни на оваа силуета, која на класичниот модел чанта му дава современа и малку неочекувана пропорција.

Како модните инсајдерки го носат овој модел

„Исток-запад“ чанти за секој ден

Еден од наједноставните начини да го носиме овој модел е со парчиња што веќе ги имаме во гардероберот. Фармерки со прав или поширок крој, бела кошула и сако прават одлична основа, додека чантата дава завршен детал на целиот стајлинг. За есен можеме да избереме модели во кафеава, бордо или темнозелена нијанса, кои убаво се вклопуваат со сезонската палета. Ако остатокот од комбинацијата е неутрален, чантата во нешто поинтензивна боја може да биде токму тој детал што ќе ја направи поинтересна.

Издолжената силуета особено убаво изгледа со панталони со широки ногавици и едноставен џемпер. Ваква комбинација има опуштена основа, но благодарение на добро одбраните аксесоари може да изгледа многу елегантно. Доколку избереме чанта од мазна кожа во црна, чоколадно кафеава или беж нијанса, можеме да ја носиме со капут со прав крој и чевли со остар врв. Резултатот е софистициран стајлинг што не бара многу детали. „Исток-запад“ чантата не мора нужно да биде во истата палета како остатокот од гардеробата. Напротив, контрастот може да биде многу ефектен. Со крем џемпер и темни панталони можеме да додадеме бордо модел, додека со кафеав капут убаво ќе изгледа чанта во темноцрвена или маслинова нијанса. Ваков пристап е особено интересен кога носиме едноставни комбинации во кои нема многу дезени. Чантата тогаш добива главна улога и станува детал што привлекува внимание.

IT чанта за вечерен стајлинг

Иако најчесто ги замислуваме во дневни комбинации, „исток-запад“ моделите можат да изгледаат многу ефектно и во вечерни прилики. За излегување можеме да избереме помал модел со метални детали, ланец или сјајна текстура. Со црни панталони и топ со едноставен крој, ваква чанта може да биде доволно впечатлива без потреба за големи парчиња накит. Ако избереме фустан, модел во контрастна нијанса може дополнително да ја нагласи силуетата и да го направи стајлингот поинтересен.

Зошто ни се допаѓа овој облик?

Покрај естетиката, „исток-запад“ чантите имаат уште една предност – нивната форма изгледа модерно без да биде тешко да се вклопи во секојдневниот стил. Може да се носат преку рамо, а некои модели имаат доволно простор за сè што ни е потребно во текот на денот. Нивната издолжена форма исто така носи поинаква пропорција на целиот стајлинг. Кога ги носиме со oversized парчиња, даваат интересен контраст на пошироката силуета, додека со едноставни и приталени парчиња создаваат елегантен изглед. Затоа овие чанти можеме да ги гледаме како моден додаток што не е резервиран само за посебни прилики. Од утринско кафе и одење на работа до вечера или вечерно излегување, вистинскиот модел лесно може да следи различни комбинации. А кога сакаме да го освежиме гардероберот без големи промени, токму ваков аксесоар може да биде доволен за на познатите парчиња да им дадеме сосема нов изглед.

---

Извор: Lepota i Zdravlje