Можеби тоа не го очекувавте, но сигурно можеме да ви потврдиме: мрежестите балетанки се најпосакуваните обувки за ова лето.
Прозирни, лесни и изненадувачки елегантни, се појавија одненадеж – и сега се насекаде. Од Дуа Липа до Џенифер Лоренс, секоја модна познавачка која држи до себе веќе си има свој пар во колекцијата. Така се роди новата сезонска опсесија: полесни од патики, порафинирани од класични сандали, mesh балетанките нудат совршен спој на удобност и стил – на најелегантен и најмодерен можен начин.
Секако, покажувањето на прстите – макар и суптилно – не е секому пријатно и тоа е сосема разбирливо. Доколку преферирате нешто поскромно, а сепак модерно и елегантно, плетените балетанки (crochet flats) се одлична алтернатива. Рачно изработени или со изглед на рачно плетени, тие зрачат со романтика, свежина и природен шарм – како да дошле директно од Азурниот брег.
НИВНАТА НАЈГОЛЕМА ПРЕДНОСТ? ВРСНОСТА.
Можете да ги носите со воздушести фустани за лежерен бранч покрај море, со широки панталони и oversize кошули за урбана комбинација, па дури и со елегантни блејзери и скроени панталони – создавајќи совршена рамнотежа меѓу формално и лежерно. Ова се чевли што ви се прилагодуваат вам – не обратно.
Во моментов, на пазарот има десетици модели: од минималистички mesh балетанки во неутрални тонови, до поодважни дизајни со металик детали, светки или живописни бои. Додека плетените модели флертуваат со романтичната страна на модата, транспарентните балетанки носат урбан, модерен дух. Но, и двете варијанти имаат заедничка филозофија: да ви обезбедат стил, удобност и слобода на движење – без компромис.
ПОВЕЌЕ ОД МОДА – ВИСТИНСКА ЛЕТНА ПОТРЕБА
Освен стилот, овие чевли се и крајно практични. Нивниот отворен дизајн и овозможува на кожата да дише – нешто што му е неопходно на секој од нас во жешките летни денови. Лесни се за пакување, не тежат речиси ништо, идеални и за куферот за одмор и за дневна торба за работа. И иако изгледаат едноставно, секој детаљ е внимателно осмислен и дизајниран со цел функционалност.
Ова лето, mesh и плетените балетанки станаа најбараните обувки во вашата гардероба. Доколку размислувате за освежување на вашиот стил и сакате да додадете летна леснотија во секоја комбинација, почнете токму од овие модели. Најубавите веќе се изложени на полиците – и чекаат вие да ги прошетате.
