Миранда Пристли се враќа — и овојпат носи многу повеќе од модни ултиматуми!
Чекањето заврши! По речиси две децении од култниот филм што засекогаш го промени начинот на кој гледаме на модата, редакциите и моќните жени на потпетици, Дизни официјално потврди дека продолжението на филмот „Ѓаволот носи Прада“ започна со снимање.
На големиот екран се враќаат старите познаници — неповторливата Мерил Стрип, Ен Хетевеј, Емили Блант и секогаш незаменливиот Стенли Тучи — но она што сите го изненади е појавата на нов, интригантен лик, кого ќе го толкува британскиот актер Кенет Брана. Тој ќе го игра мистериозниот и досега целосно невидлив сопруг на Миранда Пристли — таинствена фигура зад жената што или ја обожаваат, или се плашат од неа.
Нова приказна, ново лице на Миранда — и свет кој повеќе не е ист
Во второто продолжение, приказната напредува во пореални и пожестоки води. Миранда, која сега е веќе икона на модната и медиумската индустрија, се соочува со забрзан пад на традиционалниот печат и доминацијата на дигиталниот свет. Ликот на Брана, нејзиниот дистанциран и енигматичен сопруг, открива нова, ранлива страна на модната кралица, која публиката досега немала можност да ја запознае.
Но, тоа не е сè — ќе ги следиме и професионалните и емотивните пресврти кај Андреа Сакс (Ен Хетевеј) и Емили Чарлтон (Емили Блант), кои и самите сега се успешни жени, со свои дилеми, амбиции и тајни.
Премиера со посебна симболика — збогување на Ана Винтур
Датумот на премиерата веќе ја бранува јавноста — 1 мај 2026. И тоа не без причина! Токму на тој ден, модната кралица во реалниот свет, легендарната Ана Винтур, официјално ја напушта позицијата главен уредник на магазинот Воґ, жената за која со години се претпоставува дека била инспирација за ликот на Миранда Пристли.
Оваа симболика дополнително ја нагласува важноста на продолжението, кое, според сè што се знае, нема да биде само уште една модна бајка, туку приказна за транзиција, моќ, промени и она што се случува кога најсилните мора да се приспособат на новите правила на игра.
Култен статус кој сè уште се прераскажува
Да потсетиме, оригиналниот филм од 2006 година стана глобален феномен, со заработка над 326 милиони долари, две номинации за Оскар и реплики што и денес се цитираат. Ликот на Миранда, кој Мерил Стрип го дооформи до совршенство, влезе во историјата на поп-културата, а сцените со модни писти, кашмирски палта и остри погледи — останаа врежани во сеќавањето на гледачите ширум светот.
Сега сите се прашуваат: може ли „Ѓаволот носи Прада 2“ да ја повтори магијата? Или некои модни приказни едноставно не можат да се надминат?
Едно е сигурно: Миранда Пристли сè уште знае како се владее светот — во совршен кафеаво капучино блејзерче, со саркастична насмевка и поглед што руши сè пред себе.
