Фитнес за мозокот: Зошто тренингот е најдобриот подарок што можете да му го дадете на вашиот мозок?

ФИТНЕС ЗА МОЗОКОТ: ЗОШТО ТРЕНИНЗИTЕ СЕ НАЈДОБРИОТ ПОДАРОК ШТО МОЖЕТЕ ДА МУ ГО ДАДЕТЕ НА ВАШИОТ МОЗОК?

Јога, трчање, тегови… и помала шанса да заборавите каде сте ги оставиле клучевите.

Навикнати сме спортот да го поврзуваме со оформени бицепси, рамен стомак и познатото „-5 кг до лето“. Но… што ако ви кажеме дека физичката активност е подеднакво важна за мозокот, колку што е и за телото? И не, ова не е некоја мотивациона поетска фраза од календар.

Искусен физиотерапевт, кој веќе три децении работи со професионални спортисти, еднаш во шега рече дека „тренира за старост“ — и веднаш сфатил дека всушност не се шегува. Бидејќи, како што вели, движењето е еден од најсилните алати за одржување на здравјето и јасноста на умот.

ЗАБОРАВАЊЕ? НЕОДЛУЧНОСТ? ДЕМЕНЦИЈА? НЕ, ФАЛА.

Седењето со часови — пред компјутер, зад волан или во кафуле — не е само лоша навика, туку и брз пат до проблеми со меморијата. Науката е јасна: физичка неактивност = поголем ризик од деменција и слаба концентрација.

Од друга страна — редовното движење, па дури и прошетка низ маало, буквално може да го „успори“ времето. Како? Па, на пример, со вежбање се зголемува волуменот на хипокампусот (тој е симпатичниот дел од мозокот што ги чува спомените). Повеќе хипокампус = подобра меморија = помала шанса да заборавите дека очилата ви се на глава додека ги барате.

ШТО СÈ ПРАВИ ФИЗИЧКАТА АКТИВНОСТ ЗА МОЗОКОТ? СПОЈ НА НАУКА И ЕНДОРФИНИ:

– Ја подобрува концентрацијата и го забрзува размислувањето – дури и по една вежба!

– Помага при проблеми со вниманието – мислите дека имате АДХД? Обидете се прво со трчање, па после со кафе.

– Го забрзува учењето и приспособувањето – таканаречена неуропластичност, односно способноста на мозокот за постојано менување и раст.

– Го подобрува расположението – не само поради хормоните на среќа, туку и затоа што движењето лечи. Полека, но ефикасно.

КОЈА АКТИВНОСТ Е „НАЈДОБРА“?

За среќа — науката сè уште нема избрано победник! Значи, не мора да избирате една. Сè што ве движи – врши работа. Но, особено добри вести има за љубителките на:

– Кардио тренинзи (трчање, велосипед, зумба)

– Сила и отпор (тегови, ТРХ, кросфит)

– Тивки дисциплини (јога, пилатес, таи чи)

Клучниот збор? Редовност. Доволно е да се движите 2–3 пати неделно по 30 минути – и мозокот ќе ви биде благодарен, не само денес, туку и кога ќе се пензионирате.

И ЗА КРАЈ…

Ако сè уште мислите дека теретаните се само за задници и стомачни – време е за промена на размислувањето. Зашто и вашиот мозок сака да биде „згуснат“. И верувајте – ќе знае да го цени тоа. Особено за 30 години, кога без мака ќе ракувате со холограмски телевизор, додека вашите врсници се расправаат со далечинското.

Така што, следниот пат кога ќе кажете „Одам на тренинг“ – знајте дека не правите само „чучњеви“. Вие тренирате меморија. И тоа звучи моќно.