ДАЛИ ГО ЗЕМАТЕ ВИТАМИНОТ D ВО ПОГРЕШНО ВРЕМЕ? ЕВЕ КОГА НАЈДОБРО СЕ АПСОРБИРА!
Со влегување во најтоплите и најсончевите денови од годината, телото се обидува да го надомести она што му недостасуваше во изминатите студени месеци – витаминот D.
Познат и како „сончев витамин“, витаминот D е еден од клучните нутриенти што влијае врз речиси секој аспект од нашето здравје – од имунитетот, па сè до квалитетот на сонот и расположението.
ЗОШТО Е СЕГА ВАЖНО ДА СЕ ВНЕСУВА ВИТАМИН D?
Сончевата светлина во моментов е поинтензивна одошто во претходните месеци и нашето тело сака да се поврзе со светлината и топлината што му недостасуваа. По долги зимски месеци со ограничена изложеност на сонце, резервите на витаминот D во телото често се намалени. Затоа, дури и кога времето е потопло и повесело, можно е да се чувствуваме без енергија, слабо, па дури и потиштено. Тоа не е случајно.
Витаминот D не е важен само за здрави коски и силен имунолошки систем, туку игра голема улога и во менталната рамнотежа, добро расположение и спиење. Особено во премините од една сезона во друга, витаминот D може да биде вредна поддршка за нашето тело и ум.
КОЈА Е ЗАБЛУДАТА ЗА ВИТАМИНОТ D И СОНЦЕТО?
Многумина или претеруваат со изложување на сонце без заштита – што може да ѝ наштети на кожата – или пак целосно го избегнуваат сонцето поради страв од оштетување. Во двата случаи, телото не создава витамин D на ефикасен начин. Клучот е во контролирана и умерена изложеност на сонце, но и во соодветно земање суплементи.
Иако на Балканот и во Македонија уживаме во сонце повеќе од 200 дена во годината, околу 70% од луѓето имаат недостаток на овој витамин. Како е тоа можно? Нашата кожа произведува витамин D кога е изложена на UVB зраци од сонцето – истите оние што можат да предизвикаат повреди ако се премногу интензивни. Луѓето со потемен тен, кои се чести кај медитеранските и јужните народи, треба да бидат подолго на сонце за да произведат иста количина на витамин D како луѓето со посветол тен. Тоа е затоа што меланинот во кожата делува како природна заштита и го намалува продорот на UVB зраците, а со тоа и синтезата на витаминот D.
КОГА Е НАЈДОБРОТО ВРЕМЕ ДА СЕ ДОБИЕ ПРИРОДЕН ВИТАМИН D ПРЕКУ СОНЦЕТО?
Најповолно време за телото да произведе витамин D е помеѓу 11 и 13 часот, кога UVB зраците се најсилни. Доволно е да се поминат 10 до 15 минути на сонце со откриени раце, нозе или лице – не е потребно подолго и вака е побезбедно отколку да се остане на сонце со часови без заштита. Така телото може ефикасно да ја активира продукцијата на витаминот D, без да се загрозува здравјето на кожата.
КОГА И КАКО ДА СЕ ЗЕМА СУПЛЕМЕНТ ОД ВИТАМИН D?
Ако користите витамин D во форма на додаток, важно е да знаете дека најдобро време за негово земање е наутро или околу пладне, и тоа заедно со оброк што содржи здрави масти. На пример, со авокадо, маслиново масло, јаткасти плодови или масна риба. Витаминот D е растворлив во масти, па така многу подобро се апсорбира ако се внесе со храна што е богата со масти.
Препорака е да се избегнува земање на витамин D навечер, бидејќи има докази дека може да влијае врз квалитетот на спиењето. Правилното дозирање и изборот на време за внес на витамин D се клучни за искористување на неговите бенефити. За да останеме енергични, силни и со добро расположение, важно е да најдеме рамнотежа меѓу здравото изложување на сонце и правилната суплементација.
