Чезаре Паќоти: Легендата на италијанската обувка го напушти светот на 69-годишна возраст

Италијанската модна сцена се прости од еден од нејзините најголеми таленти.

Чезаре Паќоти, дизајнер, претприемач и пионер во светот на луксузната обувка, почина на 12 октомври во неговиот роден град Чивитанова Марке, опкружен со семејството. Заедно со сестра му Паола, Чезаре го создаде еден од највлијателните брендови на „Made in Italy“, целосно редефинирајќи ја естетиката и моќта на италијанската обувка.

Сè започна во 1948 година, кога неговиот татко, Џузепе Паќоти, основа мала семејна работилница за рачно изработени машки чевли, исполнета со италијанска прецизност и страст. Кон крајот на седумдесеттите, Чезаре и Паола ја преземаат водечката улога и внесеа свежа модна визија, соработувајќи со брендови како Версаче, Долче и Габана и Роберто Кавали.

Брендот Cesare Paciotti официјално е основан во 1980 година, препознатлив по култниот лого–штикла, симбол на сила, идентитет и сензуалност. Неговите чевли и чизми не беа само обувка – беа вистински уметнички дела. Со смели линии, неочекувани потпетици и неодолива женственост, станаа избор број еден за жените што сакаат да се истакнат – од Бијонсе до Парис Хилтон.

Брендот, со седиште во Чивитанова Марке, брзо ги освои светските метрополи – Милано, Париз, Њујорк, Дубаи. Во 2007 година, Чезаре Паќоти ја лансира „Paciotti 4US“, лежерна но софистицирана линија, докажувајќи дека луксузот може да биде дел и од секојдневието.

Зад гламурот на чевлите, Чезаре Паќоти ќе остане запаметен по неговата великодушност, скромност и непрекината потрага по убавина. Неговата обувка и ден денес претставува симбол на храброст, елеганција и уметнички дух што ги надминува моменталните трендови.