АЛКОХОЛ + СРАМ = ХАНГЗАЈЕТИ
Ако некогаш сте се разбудиле со мачнина, испокршени сеќавања и чувство на непријатност поради тоа како сте се однесувале претходната ноќ – еве ви нешто познато: хангзајети.
Сите барем еднаш сме се разбудиле со “шок од мамурлак” – кога главата пука, срцето забрзано чука, а мислите се вртат околу една единствена реченица: „Што ли, за бога, направив синоќа?“ Можеби сте му пишале на бившиот, можеби сте биле премногу емотивни со личност што ви се допаѓа, а можеби сте направиле сцена во некој бар. Каква и да е ситуацијата, чувството е секогаш исто – и има име: хангзајети.
Овој зборен спој произлегува од англиските зборови за мамурлак и анксиозност, и точно го опишува она што многумина го доживуваат ден по пијанка: психолошка тегоба што оди рака под рака со физичката нелагодност. Хангзајети не е само чувство на срам или жалење поради синоќешната вечер – тоа е емоционална бура што го вклучува сето тоа: вина, срам, страв и сомнеж во самите себе.
Во време кога менталното здравје е сè поголем приоритет, терминот хангзајети добива се повеќе внимание. Прво се појави на социјалните мрежи на почетокот од 2010-тите, но во последниве години стана особено релевантен – бидејќи се повеќе луѓе сфаќаат дека последиците од алкохолот не се само телесни, туку и емоционални.
КАКО ДА ГО СПРЕЧИТЕ ХАНГЗАЈЕТИ ПРЕД ДА ВЕ СТИГНЕ?
Превенцијата е секогаш полесна од лекувањето – па така и со хангзајети. Постојат неколку начини да се подготвите пред излегување и да ги минимизирате последиците.
1. Хидратацијата е клучна. Алкохолот го дехидрира телото, што придонесува за жесток мамурлак и чувство на слабост. Пијте вода во текот на вечерта, помеѓу алкохолните пијалаци, и задолжително пред спиење.
2. Ги познавате своите граници. Секој има свој праг на толеранција. Кога го знаете вашиот, полесно ќе препознаете кога е време да запрете. Уживајте во секоја чаша, но не заборавајте да ги ослушнете реакциите на вашето тело и ум.
3. Безбедна средина. Испланирајте го излегувањето со луѓе што ги сакате и во кои имате доверба. Избегнувајте места каде што не се чувствувате сигурни или сте под притисок. Кога сте со добра екипа, помала е веројатноста да претерате.
А ШТО АКО ВЕЌЕ ВЕ ФАТИЛ ХАНГЗАЈЕТИ?
Најважно – дишете длабоко. Хангзајети не е крај на светот. Повеќето од нас го имаат искусено ова чувство и излегле посилни. Она што е најбитно е да го препознаете тоа што го чувствувате и да не бидете претешки кон сами себе.
Прифатете ги грешките како лекција. Сите знаеме да имаме момент на слабост, но тоа не нè дефинира како личност. Наместо да се осудувате, обидете се да бидете нежни со себе и да извлечете поука од таа ситуација.
Фокусирајте се на нешто позитивно. Пешачете во природа, пуштете омилена музика, фатете се за некое хоби – што и да ве смирува. Овие активности може да ви помогнат да се вратите во себеси.
Заклучок? Не, не си сама. И не си лоша личност затоа што си испила неколку чаши повеќе.
Хангзајети всушност значи дека ти е грижа – за себе, за другите и за своето однесување. А тоа, во суштина, е одлична особина. Следниот пат, можеби подобро ќе си го распоредиш темпото – и ќе си поштедиш едно емотивно бурно утро.
